KRALENDIJK – USIBO i sigur e dos sindikatonan ku ta representá e trahadónan na BOPEC, esta BPWU i FEDEBON ta hopi preokupá. Nos ta na fin di mei i aki 5 pa 6 siman lo ta fin di yüni ku ta e fecha ku e lisensia di OFAS lo terminá.

USIBO a komprondé ku e kantidat di barínan di kombustibel ku CUROIL tabata kumpra serka BOPEC i bende ku Contour Global a kaba i ku ya pa basta siman e plan B di gezaghèber esta pa pasa pa light fuel ta den ehekushon. Ta en espera tambe pa pronto bai hinka den uzo un parke di tanki na Aeropuerto pa por bai risibí atrobe e heavy fuel i transportá esaki ku trùknan pa Contour Global.

E situashon aki ta pone ku e fondonan ku mester bai riba e kuenta speshal no ta tuma lugá mas. Manera ta konosí e fondonan aki tabata destiná parsialmente pa paga salario di e trahadónan i parsialmente pa invertí den drecha tankinan. Kiko lo bai pasa despues di 30 di yüni ku e fondonan ku lo por tin ainda riba e kuenta no ta konosí. I ta netamente esei ta e problema serio ku ta bai konfrontá. Si mes tin fondo ainda riba e kuenta pero basá riba e echo ku e lisensia a kaba, ta di unda lo bai paga e salarionan, ya ku PDVSA no por manda fondo debí na e blokeo ku Merka a imponé.

Den e siman aki USIBO lo hasi máksimo esfuerso pa yega serka gobièrnu di Boneiru i via nan gobièrnu di Ulanda pa haña sa ki posishon nan ta tuma den e situashon aki. E impakto sosial, finansiero i ekonómiko, pero tambe di medio-ambiente ta oblige e dos gobièrnunan pa tuma posishon na nos opinion. Nos ta ya pa tres aña den e situashon insigur aki.

Share This
error: Content is protected !!