KRALENDIJK – Despues di kasi 3 luna, departamentu di komunikashon di RCN ta pasa e responsabilidat di komunikashon tokante COVID-19 bèk pa servisio di komunikashon di Entidat Públiko Boneiru.

Lucia Beck, hefe di e departamentu di komunikashon di RCN: “Ku honor ami i mi tim a hasi nos máksimo esfuerso pa informá komunidat di Boneiru riba e desaroyonan di e pandemia durante di e temporada tras di lomba.”

Konsiderando ku nos ta den un fase nobo i e malchi pa informá komunidat den e krísis aki ya ta kreá, a yega e momentu pa traspasá bèk e responsabilidat di informá komunidat.

Esaki tin komo konsekuensia ku entrante 1 di yüni e website www.rijksdienstcn.com i e paginá di facebook di RCN lo no ta forma parti mas di e medionan di informashon ofisial pa loke ta trata Covid-19.

Nos ta supliká prensa pa dirigí tur pregunta i petishon ku tin di aber ku “coronavírus” na e servisio di komunikashon di OLB. Nos kier a gradisí prensa pa e koperashon ku nos a risibí durante e periodo difísil tras di lomba. Sin boso nos tarea tabata imposibel.

Mi ke a hasi uso di e oportunidat pa gradisí mi tim, ku di forma inkansabel a traha dia den dia afó pa tene prensa i komunidat informá den e temporada pisá tras di lomba. Tambe mi ke gradisí gezaghèber Edison Rijna pa e konfiansa ku e la pone den nos pa forma parti di su tim den e temporada di krísis.     

Manera semper nos tei pa sirbi prensa i komunidat di Hulanda Karibense pa duna informashon tokante e departamentu i organisashonnan di gobièrnu di Reino Hulandes, tabata loke hefe di komunikashon di RCN, Lucia Beck a informá.

Share This
error: Content is protected !!