KRALENDIJK – Un huma blanku djarason último a pasa i baha riba Boneiru durante oranan di trai mèrdia. Sinembargo esaki tabata muchu mas visibel den oranan di atardi promé ku solo a baha. Por komprondé ku e situashon tabata igual na hermana isla Kòrsou. Radio Live 99.9 FM a tuma kontakto ku Kapitan di Haf sr. Gunther Flanigen, relashoná ku e situashon, komo ku na promé instante tabata pensa ku por tabatin algu (barku) na kandela riba laman mirando for di unda e huma tabata bini. Flanigen a menshoná ku nan a tuma nota di e situashon i a papia ku wardakosta. Miembronan di wardakosta a informá ku no tin nada partikular riba laman ku ta okashoná huma pa e isla.

Radio Live 99.9 FM a tuma kontakto tambe ku “Servisio Meteorológiko Kòrsou” (Meteo) relashoná ku e situashon ariba menshoná. “Meteo” a informá ku na promé instante a pensa ku por tabata trata di stòf di sahara ku ta pasa den e área di Karibe. For di komienso di luna a atvertí ku pa e próksimo dianan lo sinti e stòf di sahara riba nos isla. Un fenomeno ku ta ripití tur aña den e mesun temporada. Tin aña esaki por ta mas fuerte ku e otro. E aña aki a keda atvertí pa tene kuenta ku e ta mas fuerte i esnan ku malesanan di pulmon mester tene èkstra kuenta ku esaki.

Despues ku Meteo a siguí hasi algun investigashon, a detektá den un di e imágen nan satélite, áreanan di kandela di mondi riba e parti nort di Venezuela. Debí ku e fluho di airu na nivelnan mas abou di atmósfera ta di un direkshon sùitost, e kantidat di huma por a wòrdu transportá riba nos region durante djarason último.

Tambe Meteo a komuniká ku un representante di Servisio Meteorológiko di Venezuela, ku a konfirmá ku tabata tin un kantidat di kandela di mondi, pero debí na e kantidat di yobida di último dianan un gran parti di e kandelanan aki a wòrdu paga. Pues lo no antisipá mas huma for di e kandelanan aki por lo pronto.

Share This
error: Content is protected !!