KRALENDIJK – Diputado Pablo ‘James’ Kroon ta anunsiá un seri di akshon i proyektonan dirigí riba e profeshonnan Piskadó i Kunukero ku meta pa strukturá e sektor importante aki di un forma duradero i ku por trese e garantia di seguridat pa tur enbolbí.

Djamars 26 di mei 2020, Diputado James Kroon a reuní ku representantenan di Haf, R&O, L.V.V. i e fundashon Piskabon. Meta di e enkuentro aki tabata pa atendé algun punto ku ta relevante pa e piskadó. Manera risibí atvertensia korekto i na tempu na momento di mal tempu i speshalmente sùitwèst. E punto aki ta importante pa garantisá seguridat di e piskadó, doño di boto i famia di e piskadó. Otro punto ku a keda atendé ta pa identifiká un sitio adekuá pa yega na un ‘Suidat di piskadó’ ku mester inkluí un lugá adekuá pa baha i subi boto (slipway), lugá sufisiente pa maniobra i para tráiler, lugá pa almasená piska i tambe dos punto di benta di piská. Dentro di poko desishon lo kai pa loke ta trata e sitio mas adekuá pa realisá esaki. E servisionan ta trahando duru riba realisashon di e dos puntonan aki pa asina nos gobièrnu por sigi traha riba e struktura ku mester duna realse na e sektor importante aki.

Pa loke ta trata e sektor di agrikultura, a enfoká riba kreashon di un base sólido na e servisio konserní (L.V.V.). Esaki ta un paso krusial pa por garantisá durabilidat di e prosesonan ku lo bai wòrdu enkaminá pa hiba Boneiru na un grado akseptabel di produkshon di su propio kuminda. Na e momento aki e grado di produkshon di kuminda propio, ta bou di 5%, loke no ta akseptabel.

Banda di produkshon di kuminda i kuminda pa bestia pa supstansiá e sekshon di krio di bestia, nos lo promové kreashon di areanan bèrdè, komo parti di proyektonan di infrastruktura.
Segun Pablo ‘James’ Kroon, diputado di entre otro Agrikultura, Krio di bestia i Peskeria; “Bo por ta sigur komo pueblo, ku mi lo sigi informá pueblo di e pasonan ku nos lo sigi tuma pa realisá nos metanan pa ku e sektor di Agrikultura, krio di bestia i peskeria”.

Share This
error: Content is protected !!