BEN OLEANA A ENTREGÁ SU RETIRU NA BHM PA DIFERENSIA DI OPINION DI POLITIKÁ

KRALENDIJK – Resientemente diputado Elvis Tjin Asjoe a menshoná durante un reunion di konseho insular, ku direktor interino di “Bonaire Holding Maatschappij” (BHM) a tuma su retiru. Esaki ta loke a sosodé, kaminda direktor di BHM a entrega karta di retiru pa medio di e presidente komisario Karel Frielink.

Oleana den e karta entre otro a menshoná ku e huntu ku su tim a hasi un kantidat grandi di trabou durante e 6 lunanan tras di lomba, pa independisá i profeshonalisá e kompanianan ku ta kai bou di BHM, i esaki den preparashon pa disolvé BHM. Oleana no por a konta ku sosten di hunta di komisario di BHM, tampoko di e akshonista, esta gobiernu di Boneiru.

Oleana ta e persona responsabel pa BHM i e kompanianan, e ta tambe responsabel di daño na maneho di BHM. Pa e motibu aki e no por a hasi otro, i a entrega e funshon entrante 31 di mei 2020. Pa interes di ekonomia di Boneiru i kompanianan, mester a kumpli ku kondishonnan básiko promé ku disolvé BHM. Esaki ta enserá bon maneho, entre otro “nulmeting”, e parti finansiero mester ta na òrdu, huntanan di komisario mester ta funshoná independientemente, i no liga polítikamente segun kódigo di “corporate governance”.

Tin indikashon ku e hunta di komisario di BHM i e reunion general di akshonista, tin diferensia di opinion, Oleana a menshoná. El a pone den su karta ku esaki ta bon konosí pa tantu hunta di komisario di BHM i miembronan di Bestuurscollege. Entre Oleana i su tim tabatin un diferensia fundamental di opinion i hunta di komisario di BHM i Bestuurscollege na e otro banda, pa loke ta trata ponementu di bon maneho den e kompanianan di gobièrnu. Komo ku ta trata aki di prinsipionan básiko na interes di Boneiru i e desaroyo di e entidatnan di gobièrnu, Oleana ta bisa e no por uni su mes ku e liña ku reunion general di akshonista den koperashon ku e hunta di komisario di Holding a stipulá.

E meta ta pa eliminá BHM mas tarda fin di 2020. Loke nan a sosodé a pone ku Oleana a pèrdè konfiansa den e funshon komo direktor. Oleana ta lamentá e disishon, sinembargo e i su tim a hasi tur esfuerso pa pone kos kana na òrdu den su funshon,  sinembargo esaki no a duna resultado. Tur dokumentu ta entrega, pa e persona ku kontinuá ku e funshon, por sigui ku e tarea. 7 luna Oleana a mantené den e funshon komo direktor, despues ku e tabata miembro di hunta di komisario di e kompanianan un temporada kòrtiku. Pa diputado Tjin Asjoe, Oleana ta un persona di konfiansa, i pa e motibu ei a nombr’é komo direktor di BHM, na luna di novèmber 2019. 

Share This
error: Content is protected !!