Kompader , asina bo a bai. Ken por a pensa? Djarason 20 di mei, atardi lat Liduska ta kore yega parokia La Bírgen di Coromoto, huntu ku algun persona mas, nan tabatin e tarea den misa loke nan ta hasi ku regularidat. Ami tabata trein algun kantika di misa pa presentá e siguiente mainta. Nos a papia manera kustumber i tur hende a bandoná e sitio kontentu algun minüt pasa di 8’or di anochi. Djis un ratu despues mi a tuma nota di algun notifikashon, indikando ku mi kompader Enoc“Noki” Melaan ta pèrdí. Mi a reakshoná den mi mes, ku no por ta posibel pasobra mi tabata huntu ku su señora i no tabatin nada ku ta ilustrá loke mi a skucha. Poko despues mi a haña konfirmashon ku ta e persona ei mes ta pèrdí den mondi.

 Nos tur sa i ta konsiente ku tardi òf trempan nos tin ku pasa pa un otro bida. Apesar ku nos sa esaki, e momentu di bèrdat ta esun mas doloroso i difísil pa aseptá. Dios a krea nos asina. Pa e motibu aki ta importante pa nos biba bon i na pas ku otro, loke “Noki” ta un ehèmpel. No ta pòrnada tabatin un kantidat di persona pa yuda ku e búskeda. Loke bo planta bo ta kosecha. Mi a pasa kumpra algu na Lianxiang Supermarket i e hendenan ta desanimá. Nan a bisami un bon hende a bai, kende sèmper a kumpli ku su labor serka nan, momentu ku tin palabrashon.  

2018 “Noki” i Liduska a aserkámi pa mi bira padrinu di nan yu mas chikitu. Mi a tuma den sin pensa. Mi sa ku bo tabata i ta un bon tata pa e yunan. Bo stima nan, meskos nan tambe stimabo. Bo amor i kayente ku bo tin pa nan, niun otro hende por yena esei. Amor di tata pa yu ta úniko. Meskos ta e kaso esun di mama.  Kada un ku nan sentimentu. Mi tei pa duna bo yu e sosten i guia momentu ta nesesario. For di shelu bo mes lo pèrkurá pa nan ku un vishon mas amplio pa medio di Señor. Sosegá na pas i Señor lo tin un lugá den su reino p’abo. Forsa na komèr Liduska i e muchanan i otro miembro di famia di ámbos banda. Dios yena e bashí ku a keda tras i duna forsa i animo pa kontinuá. 

Share This
error: Content is protected !!