KRALENDIJK – Entiero di Enoc “Noki” Melaan, manera por a spera, a haña enorme atenshon di personanan pa sostené famia promé, durante i despues ku a hiba e defuntu su último lugá di sosiegu. Enoc ta un persona sigur hopi kerí i stimá den e bario di Nort Saliña.

Ayera djadumingu 31 di mei a hiba “Noki” su último lugá di sosiegu, despues ku tabatin momentu pa topa miembronan di e famia, pa despues Santu Sakrifisio di misa sigui pa santana. Promé ku a sera kaha ku e defuntu drumi aden, Rítmiko Timon Krioyo a toka algun kantika pafó di misa, entre otro kantando e kantika dediká na Enoc: “Te despues”. Un kantika hopi emoshonante i ku un stèm gritando ……‘Noki’…….. ku ta simbolisá i rebibá e momentu ku tur hende tabata enbuska di dje i alabes awor ku e no tei mas huntu ku nos.

Un enorme doló pa famia a keda despues ku “Noki” a pasa pa un bida nobo. No ta eksistí un doló mas profundo ku despedida di un ser kerí. Señor ta sostené nos tur, i manera nan ta bisa e no ta duna e hende un karga mas pisa ku e no por karga.  

Despedida di un hende ta parse inkomprendibel, sinembargo nos tin ku biba konforme boluntat di Dios. Te a krea nos, e sa tur kos di nos sin eksepshon. Tur hende sa ku un dia nan ta pasa pa un otro bida i e momentu ta hopi doloroso. Ta Señor a krea nos asina. Nos no por yuda.

Durante misa di entiero Kor Flor di Coromoto a animá. Diferente ekipo ku “Noki” tabata militá aden tabata presente. Entre otro tim di domino The indians, Ahichi i Strea di Oro. Timnan di futbol Nort Saliña Vets, Estrellas, Flamingo i La Fama etc. Momentu ku a sali ku e defuntu for di misa a supla tròmpèt i tabatin músika zonando na e sitio. Un kantidat di outo i hende a bai direkshon di santana pa hiba e defuntu su último lugá di sosiegu. Pafó di santana Rítmiko Timon Krioyo a toka den seku manera nan ta bisa pegá ku porta di santana. Atenshon pa “Noki” tabata inmenso. Simplemente e tabata un bon hende i nos ku a keda tras, mester usa esei komo ehèmpel. No laga dia pasa i lubidá. Forsa na famia den e momentunan difísil, di parti di staf i personal di Radio Live 99.9FM. 

Share This
error: Content is protected !!