KRALENDIJK – Pa analista Arthur Sealy e ekspreshon “normal nobo” no tin ningun klase di kontenido. Ta simplemente un ilushon. Loke ta bini dilanti ta ku Gobièrnu huntu ku Diálogo Sentral ta bai traha riba plannan sosioekonómiko. Covid-19 a mustra ku ta un struktura nobo mester bini. Gobièrnu eligí pa medio di Konseho Insular skohé pa pueblo ta esun pa traha maneho i no Diálogo Sentral.

Awor ku Bonaire ta den krísis Gobièrnu mester papia palabra kla i mustra KON nos ke gana nos sèn i no kon nos MESTER gana nos sèn. Bonaire ta parti di Hulanda i ta dependé di ayudo hulandes. Hulanda a kambia su strategia kaba i ta atendé ku instansia i organisashonnan.

Otro aña na mart tin elekshon pa Tweede kamer na Hulanda i sondeonan ta mustra ku CDA i D’66, e amigunan di e koalishon di Bonaire, ta pèrdiendo forsa. VVD, PvDA, i Groen Links ta kresiendo i nan no ta partidonan ku ta amigu di e manera kon ta goberná Bonaire. Si e tendensia sigui asina CDA òf D’66 no ta den gabinete hulandes mas. Mi ta konsehá votadónan vota; Groen Links pa van Raak ku ta preferá traha ku instansia i organisashonnan sosial i laga gobièrnu un banda. Promé ku Hulanda intervení Gobièrnu di Bonaire tin e obligashon di eliminá e trabounan inútil na Bonaire.

Spañónan for di siglo dieseis a papia di Islas Inútiles, Trabounan inútil ku no ta añadí nada na prosperidat i bienestar di e pueblo, ku sí ta kosta pueblo sèn ta: mènedjer, konsùltent, relashonista públiko, kuido di hubentut, konsehero di maneho, konsehero di diputado, lider di proyekto, lider di tim, rekurso humano, kordinadó di proyekto i bòshi trahadó atministrativo.

Esnan ku meresé mas na entrada, rèspèt i apresio ta: panadero, kunukero, trahadó di Selibon i esnan den mantenshon ku for di sink’or di mainta ta kuminsá traha. Diputado ku ta kana tur mainta mester a ripará esei. Mi konseho na diputado ta: subi trùk di shushi un dia i traha di 6 pa 2 i eksperensiá e trabou noble ei. No tin mester di bisti bachi ku dashi. Pa elekshon di mart 2021 na Hulanda Koalishon por keda biba den su ilushon ku yama “Normal Nobo” E lema “Kos nobo nos ke” a kambia pa “Normal nobo nos ke”

Share This
error: Content is protected !!