PIKÒP TA DAL 2 BURIKU NA ENTRADA DI AMBOINA

KRALENDIJK – Awe djaluna 1 di yüni, siman i luna nobo a habri ku mala suèltu pa shofùr di un pikòp Mazda kolo blanku na momentu ku dos buriku a krusa kaya su dilanti na entrada di Amboina. E shofùr a purba pa evitá e choke sinembargo no a logra. E pikòp a dal e burikunan di kual un di nan a muri na e sitio dor di e impakto. E otro a bai kai den mondi kantu di kaminda i no por a sigui su rumbo debí na heridanan ku e la risibí. Shofùr di e pikòp man na kabes a indiká ku diripiente e burikunan a sali for di Amboina, krusa su dilanti pa drenta mondi. El a reakshoná mesora pero no por a evitá e choke. E no tin trabou na e momentunan aki debí ku frontera ta será i no tin turista biniendo Boneiru. E la pidi ayudo na e instansia nan konserní, sinembargo ainda e no a haña ayudo. Awor e ta hañ’é den e situashon aki miéntras el a risibí sierto indikashon ku seguro no ta kubri daño na momentu di choke ku buriku.

Ta bon pa usarionan di tráfiko tene kuenta ku ta temporada di sekura i e animalnan ta frekuentá area habitá ku mas frekuensia.

Polis a dirigí tráfiko na e sitio miéntras CRS a presentá pa registrá e aksidente.

Share This
error: Content is protected !!