KRALENDIJK – Radio Live 99.9 FM komo un famia uní, semper ta organisá aktividatnan sosial pa su empleadonan. Djadumingu último esaki tabata e kaso un biaha mas na momentu ku empleadonan di Radio Live 99.9 FM a hasi un paseo den mondi riba “quad”. Impreshonante tabata e ruta ku e grupo bou di guia di Orlando Francisca i su trahadónan a pèrkurá pe. Boneiru tin un tremendo naturalesa. Apesar ku ta temporada di sekura, Boneiru su naturalesa ta bria. Nos a kore for di Lagun, subi seru largu, sali na Sabadeco, sigui den mondi yega Rincon, pasa parsialmente den e bario i kontinuá den mondi yega Altamira. Despues di un pouze kòrtiku, disfrutando di e bunitesa di Rincon for di ariba, e grupo manehando “quad” ku nan guia a regresá playa pa medio di mondi. Un ruta di masomenos 4 ora i mei. Tur hende a pasa bon gosando di e paseo, mas bien e enkuentro ku koleganan. Despues na yegada tur a disfrutá di un sukulento BBQ.

Kombinashon di potrèt ta ilustrá parti di e aktividat. Koleganan di Radio Live 99.9 FM ta yama danki na gerente pa e aktividat. Nos a disfrutá di e dia.    

Share This
error: Content is protected !!