KRALENDIJK – Relashoná ku e desaroyonan tokante kon por kuminsá ku entre otro biahamentu entre islanan, Radio Live 99.9 FM a papia ku gezaghèber Edison Rijna kende ta na kabes di EBT. Gezaghèber Rijna: ”Djabièrnè último nos a papia durante reunion di EBT i a yega na e desishon ku hóbennan te ku 17 aña por práktika deporte di futbòl i organisá kompetensia. Di e manera aki ta duna oportunidat pa hóbennan pa praktiká deporte den nan tempu liber. Nos ta sperando un konseho e siman aki di RIVM Hulanda i e tim di maneho di Hulanda, esnan ku ta bai konsehá nos pa un posibel habrimentu di nos frontera. Momentu ku nos risibí informashon, lo atendé kiko ta e medidanan ku mester tene kuenta kuné.

Nos ta den kombersashon ku hermana isla Kòrsou pa por inisiá ku buelo di Kòrsou pa Boneiru i vise versa. E plan ta pa habri e espasio áereo entre e 2 islanan, abase di un maneho, i poulatinamente kita e medidanan. Un di e dianan aki lo bolbe sinta ku ministernan pa wak kon ta bai implementá buelonan entre e islanan. Boneiru ta hopi kouteloso kon ta bai habri frontera. No ta solamente e asuntu di ‘coronavirus mester tene kuenta kuné. Mester ta kla pa por risibí e bishitante nan for di eksterior.

KLM ta planiando pa kuminsá bula pa islanan ABC. Ya nan ta tumando registrashon di buelonan, sinembargo mester tene kuenta ku frontera ta será te ku dia 15 di yüni. Ta despues di e fecha aki ta tuma desishon si ta kla pa habri frontera. Pues ta bon pa tene kuenta ku e situashon, esta ku frontera ta será. Mas i mas hende ta yegando nos isla pa sostené i stabilisá e parti médiko na Boneiru. Esaki ta nesesario pa si akaso e vírùs yega Boneiru, nos ta mas mihó posibel prepará pa atendé,” gezaghèber Rijna a menshoná.  

Share This
error: Content is protected !!