KRALENDIJK – Situashon na BOPEC ta keda delikado. Informashon ku Radio Live 99.9 FM ta disponé di dje ta indiká ku tin kambio a tuma lugá den e hunta di direktiva di BOPEC. Fabiola Valles Ramires no ta den e posishon komo mènedjer direktor, i na su lugá a pone di Carlos Alberto Coredor, kende ta e mènedjer direktor nobo di hunta di direktiva di BOPEC.    

Radio Live 99.9 FM a drenta den kontakto ku gezaghèber Edison Rijna relashoná ku e situashon na BOPEC. Gezaghèber na su turno a menshoná tokante entre otro beslag ku tabatin riba e kompania. “Resientemente tabatin entre otro problema ku retraso den pagamentu di salario di trahadónan di BOPEC, sinembargo trahadónan logra haña nan sèn di luna. Pues e situashon ta kontrolá, despues ku trahadónan a risibí nan pago. Gobièrnu ta prepará si algu sosodé i trahadónan pèrdè trabou pa por yuda algun di nan. E kompania madre di BOPEC, esta PDVSA ta primintí ku nan ta kumpli ku tur medida pa e kompania ta stabil i por duna e servisio momentu ku esei ta na vigor atrobe.

Por komprondé ku tin un kambio pa loke ta trata direktorado di e hunta di direktorado di BOPEC. Ofisialmente nos no a haña e informashon. Ta trata di un kompania privá i te na e momentu aki nan ta kumpli ku loke ta nan responsabilidat. Gobièrnu di Boneiru a inisiá nan plan B pa por trese ‘heavy fuel’ pa medio di otro porta, pa hib’é na ‘Contour Global’. Esaki ta loke a prepará pa evitá ku yega asina leu ku BOPEC no por entrega kombustibel pa ‘Contour Global’. E kompania di ‘Contour Global’ tabata kumpra e ‘fuel’ serka BOPEC, sinembargo awor e situashon a kambia debí na problemanan ku a inisiá algun luna pasa. Gobièrnu ta kla pa yuda momentu ku ta nesesario, loke ya nos a palabra ku BOPEC.

Nos a keda aserka pa sindikatonan kaminda pronto nos ta yega na palabrashonnan. Tin diferente kombersashon a presentá na mi persona, sinembargo nos komo gobièrnu no tin nada di bisa pasobra BOPEC ta un kompania priva. Bèrdat tin diferente interes den BOPEC, sigur pa e situashon di petroli mundialmente, tin nesesidat pa sitionan pa warda petroli, pues un kompania manera BOPEC ta importante pa su eksistensia. BOPEC bèrdat tin sierto tareanan ku nan no ta kla kuné, esta e parti di mantenshon pa e kompania ta operashonal. Ta responsabilidat di e kompania madre pa e parti aki por ta na su lugá,” gezaghèber Rijna a bisa. 

Share This
error: Content is protected !!