KRALENDIJK – Sharlon Legito di 47 aña di edat a hañ’e den un situashon ferfelu djadumingu mardugá na momentu ku el a aksidentá ku bròmer. Segun su deklarashon, polis a pone ku el a aksidentá ku su motosaikel.

Sharlon: ”Mi tabata na ‘Far East’ i a disidí ku mi ta bai yena e bròmer ku gasolin. Mi a yama un amigu pa por a fasilitámi pa usa su karchi di banko pa yena e tanki di gasolin di e bròmer, komo ku pòmp di gasolin a sera i mi no tin karchi di banko. Mi yu ohochi di 8 aña a bisami e ta bai kumi riba bròmer. Mi amigu tabata kore nos tras. Na pòmp di gasolin e yu a drenta outo ku mi amigu komo ku e tabata sinti friu riba bròmer. Nos a sali di ei pa bai subi kaya Korona. Den bisendario di ‘Lucas’ mi a topa un agente polisial riba kaya i a pasa banda di dje sigui bai. Mi a topa dos tres polis mas riba kaya i a pasa nan i sigui kore. Mi no tabata sa sigur ku ta outoridat paso tabata skur i nan no a dunami señal pa stòp. Mi a tuma nota ku nan a purba pushami sin logra. Mi a sak i pasa bai laganan. Mi sa ku mi no ta den nada pesei mi no a para. Mi a kaba yega den kaya.

Un amigu a bisami hiba e bròmer kas paso tin problema. Koriendo riba kaya Nikiboko Sùit mi a sinti ku tin un vehíkulo tabata persiguími. Mi no tabata sa ku ta polis òf un enemigu. Nan no tabata tin ‘zwaailicht’ sende, si no mi sa ku mi mester a para. Despues mi a komprondé serka algun persona ku ta polis tabata persiguími. Mi no a para, pasobra mi no ta den nada inkorekto. Mi no a pone ‘fever’ ni nada. Un kos so mi a hasi ta pasa den un kaya ku ta prohibí pa kore den dos direkshon, pasobra e amigu a bisami hiba e bròmer kas. Mi ke a bai kas bai warda e bròmer, paso e no ta dimi. Riba kaya Internashonal yegando den e bògt pegá ku kazerna di brantwer, nan a mishi ku mi motosaikel ku e pikòp i mi a kai i pèrdè konosementu. Na hòspital mi a bin bei i nan a kontami loke a sosodé. Mi a kibra un wesu di nanishi, un repchi i mi a pèrdè un djente. Danki Dios mi yu no tabata riba e bròmer ku mi.

Mesora ku mi a sali foi hòspital pa bai kas, mi a bai warda di polis pa duna mi deklarashon i entregá un keho kontra e persekushon polisial. Na warda di Polis nan a bisami keda trankil, paso e kaso ta bou di investigashon. Tin hopi testigu ku a mira kon e polisnan kier a trapa mi ku outo. For di 2018 mi a kambia mi bida i kuminsá biba otro for di e forma ku mi tabata biba ántes. Mi ta kue mi djòpnan 24/7 i tin hopi yu pa kria. Mi no tin tempu pa e ko’i kèns nei” Sharlon a bisa. Mi no ta inskribí na Boneiru i mi no sa ken ta bai kubri gastunan di hòspital. Aimed Ayubi a bisa ku el a tuma kontakto ku e bosero di kuerpo polisial i nan a bisa ku awor nan no por bisa nada debí ku e víktima a entrega un keho ofisial i e kaso ta bou di investigashon. Loke si nan a bisa ta ku e outo di polis no a mishi ku e motosaikel ku bo a aksidentá kuné, Aimed a menshoná. Sharlon a finalisá bisando ku e no ta den nada inkorekto i mi ke pa solushoná loke a sosodé. Ami tabata riba e bròmer i mi a sinti ku nan a chep e bròmer. Nan bai wak kamaranan den bisendario” Sharlon a bisa.

Share This
error: Content is protected !!