KRALENDIJK – Despues ku trabounan tabata paralisá i no por a sigui manera mester ta debí na e pandemia di ‘coronavirus’, asfalt a kuminsá kore djaluna tras di lomba. Ta trata di den e área di Skol Amplio Papa Cornes na Nort’i Saliña. Diputado James Kroon i Elvis Tjin Asjoe a bai na e sitio pa tuma nota di e trabou. Ya a pone promé kapa di asfalt i dentro di poko ta pone e kapa final. Kaya Leiden, e kaya prinsipal ku ta bai e skol ariba menshoná, ta trahando un sekshon pa hende kana. E kaya ta bai ta konstruí den e konsepto: kaminda pa outo i na banda un parti ku mata i despues e paseo pa hende kana. Otro banda di e kaminda ta bai tin un parti pa kore baiskel (Fietspad). E trabounan na e kaya aki a ranka sali algun dia atras.

Diputado James Kroon a menshoná ku ta bai drecha diferente otro kaya na Boneiru. “Pa e aña aki ta bai atendé ku Hulanda pa yega na fondonan disponibel pa kaminda Broertje Janga i drecha kaminda di bai Rincon, esun parti pariba. Ta notabel ku kaminda di bai Rincon ta den un estado fastioso ku ta rekerí atenshon. Hopi vehíkulo di peso ta pasa riba e kaya, entre otro pa bai BOPEC, loke ta kibra e kaya debí na e peso ku nan tin. Despues di e área di skol Amplio Papa Cornes, ta bai e skol den bario Antriol i kontinuá na Rincon. Seguidamente ta bai renobá kaya Amsterdam kompletu. Mas despues ta bai konstruí un rotònde na entrada di Rincon,” diputado Kroon a menshoná.

Diputado Elvis Tjin Asjoe a bisa ku e ta kontentu ku trabounan di asfaltamentu di kayanan. El a papia kon e proseso di asfaltamentu ta tuma lugá. E trabounan tin influensia positivo riba ekonomia. ‘Coronavirus’ a stroba hopi kos ku no por a kontinuá òf nan a kai atras finansieramente, manera pa hotèl i restorantnan, diputado Tjin Asjoe a bisa.

Share This
error: Content is protected !!