KRALENDIJK – Un suidadano a informá Radio Live 99.9 FM tokante un situashon ku tin hopi dia, kaminda un fli ta pegá den waya di koriente. E suidadano a menshoná ku pa un òf otro motibu subidónan di fli ta pèrdè kontròl di e fli, loke a resultá den waya di koriente.

“Mi no sa ku e wayanan ku e fli ta pegá den dje tin koriente si òf no. Mi pregunta ta: no tin niun hende sea di WEB òf un di e otro kompanianan ku tin waya kologá den laria, ku por duna atenshon na e situashon? Òf kisas ami ta robes i mester warda te momentu ku kisas tin korto sirkuito pa presentá na e sitio ku tur e konsekuensianan.

E dianan aki tin hopi bientu i ta notabel kon e fli pega den waya ta dal den e otro wayanan. Ta un trabou di ménos ku 5 minüt, djis un persona ku konosementu di koriente i ta traha na un di e instansianan ariba menshoná subi kòrta e fli pega den e waya,” e suidadano a menshoná.

Potrèt ta ilustrá un di e situashon nan na komienso di kaya Maximiliana Rosario, bario Tera Kòrá.

Share This
error: Content is protected !!