ORANJESTAD – Durante e Conferencia di Prensa di Gobierno di Aruba dialuna anochi, Prome Minister Evelyn Wever-Croes a duna di conoce cu Gobierno di Aruba ta trahando riba e reapertura di frontera. E meta tawata ta pa habri nos fronteranan mita di juni 2020 pero ainda esaki no ta definitivo. Pero si ta trahando pa keda cla pa cu e fecha stipula pa Minister di Turismo y Salubridad, Dangui Oduber, cual ta entre 15-30 di juni, 2020. E fecha tentatIvo aki a ser anuncia pa Minister Oduber cu hopi anticipacion ya cu e cantidad di personanan cu ta traha den e sector aki ta grandi y mester cuminsa prepara cada un di nan.

Na e momentonan aki protocolnan ta wordo prepara y tur staff y personal ta hañando diferente curso pa asina tur ta bon prepara pa cu e re-apertura di nos fronteranan.

E fecha definitivo pa cu e habrimento di nos fronteranan lo wordo anuncia manera e decision wordo tuma. Premier Wever-Croes ta sigura comunidad di Aruba cu e decision pa cu e fecha aki ta basa teniendo cuenta cu siguridad y salud di nos hendenan.

Na e momento aki Gobierno a anuncia cu ta safe pa habri nos economia interno. Minister President a menciona si cu e ta preocupa di mira con hopi hende a haci dimas mirando e aglomeracion di hende varios caminda y tur tawata hopi cerca di otro. Un otro preocupacion cu Minister President a expresa tawata tambe cu a laga hopi sushedad atras pa esnan cu a bishita e beachnan y esaki ta algo cu nos como Arubiano no ta acepta.

“Gobierno ta spera cu esaki tawata manera un “racha” despues di toque de queda y cu e no lo continua asina. Comunidad di Aruba mester ta cauteloso y esaki no kiermeen cu no por sali ni diberti pero semper mester keda cu cautela. Mientras tanto Gobierno ta trahando riba e re-apertura di e fronteranan y unabes tin tur cos cla lo tuma un decision pa cu e fecha aki y lo anunci’e publicamente. E decision pa cu e fecha aki ta basa riba siguridad y salud di nos hendenan. Comunidad di Aruba mester ta consciente si cu e virus aki tey pa un tempo largo y ta keda na cada un di nos pa minimalisa e riesgonan cu ta dispuesto pa tuma”, Prome Minister Evelyn Wever-Croes a duna di conoce.

Share This
error: Content is protected !!