KRALENDIJK – Hulanda a manda pa Boneiru na 2019, un montante di 46.5 mion dòler, loke ta un influensia enorme pa e isla. Esaki tabata di e asina yama ‘vrij uitkering’ i pa medio di diferente proyekto finansiá atraves di ‘bijzondere uitkering’. Durante reunion di konseho insular hefe di sekshon di finansa, Dudley Wedervoort, a menshoná entre otro e tópiko aki. El a bisa kon Boneiru su situashon finansiero komo entidat públiko ta awor, basá riba sifranan di 2019.

“Nos situashon di likides di aña pasa tabata bon. Ku likides, plaka efektivo ku nos tin por kubri nos gastunan sin problema pa sigur 2 aña. E situashon aki ta kreá, entre otro pa e echo ku tin fondo ku tabata presupuestá pa usa durante 2018, sinembargo finalmente no a us’é. Fondonan ku a sobra na 2018 i ku outomátikamente a pasa pa 2019. Ta hopi importante pa mantené bo likides stabil, pasobra si presentá un situashon di krísis, loke ta e kaso awor ku ‘coronavirus’, tin reserva pa kubri gastunan,” Wedervoort a menshoná.

El a sigui bisa: ”E resultado finansiero di 2019 tabata bon, loke a fortifiká nos reserva finansiero. OLB tin biénes, entre otro edifisio, mobilario, parke di outo, fondo riba kuentanan bankario i kliente ku debe nos. Ta trata di plaka di pueblo loke nos ta generá na impuesto. Nos ta usa e plaka, sinembargo si sobra e ta bai den nos reserva. E propio kapital di OLB ta di 108 mion dòler. For di esaki 48 mion ta plaka di pueblo, di kua 13.2 ta di kreditornan. Tin ademas 46.5 mion dòler ku Hulanda a hinka den Boneiru aña pasa,” Wedervoort hefe di sekshon di finansa a bisa. 

Share This
error: Content is protected !!