KRALENDIJK – Diputado Elvis Tjin Asjoe resientemente a papia tokante e situashon ku tin durante reunion nan di konseho insular. E diputado a menshoná ku durante reunionnan di konseho insular, ta kaminda e hende ta aprobá lei, entre otro kambionan di presupuesto algun bia pa aña i kuenta anual. Nos a tuma nota ku apesar ku ta temporada di krísis, tin un oposishon ku no ta koperá, loke ta di lamentá. “Tur loke  presentá pa atendé durante reunion ta un problema. Nan ta habri un kaha di ‘Pandora’, kon pa blòkia reunion pa no yega na desishon. Nan meta ta pa stroba kos i despues pa nan sali bisa ku e gobièrnu aktual no ta hasi su trabou. Nan ke duna e gobièrnu aktual un stèmpel negativo.

Mi ta hopi kontentu kon nos ta hiba gobernashon último tempu, apesar ku e situashon di doló di kabes ku oposishon den konseho insular. Nos tin hende ku kebrante di salu ku ta den eksterior, UPB tambe tin un persona ku no ta bon di salu, loke ta pone ku nos no por yama un reunion. Mester tin mayoria pa por tin korem. Oposishon no ta koperá, entre otro durante promé kambio di presupuesto, pa pone sèn pa paga kosnan debí na e pandemia aktual, manera hendenan ku ta den eksterior ku mester regresá Boneiru, momentu ta atendé esaki, i mester pasa e presupuesto, oposishon ta sali na kareda bandoná sala di reunion. Nan no ta partisipá pa forma korem pa por atendé e kosnan pa komunidat. E kosnan aki no ta korekto, esta loke e pueblo ta deseá.

Durante reunion di konseho insular último mi a bisa bon kla, nos ta den un situashon di krísis, tuma ehèmpel riba pingwin. Momentu ku e pingwin ta den un situashon di krísis, esta hopi friu ku bientu, nan ta hala serka di otro pa pasa e temporada den union sostené otro. Esaki ta loke nos tin ku hasi sigur kaminda nos por aprobá sèn pa por atendé ku e krísis na Boneiru. Tokante entregamentu di dokumentu na tempu, sèmper e diskushon ta keda. Kuantu ku bo duna nunka lo no ta sufisiente. Kada bes oposishon ta habri un kaha di ‘Pandora’, i si e haña dokumentu, e ta lesa i aktua robes. Nos mester ta realístiko, ku nos ta den un temporada di krísis.

Resientemente a bin dilanti ku nos mester tin bachi bisti durante e reunion i no solamente kamisa. Loke mi ke bisa ta ku nos ta den un krísis i asta nos mester lora manga di kamisa pa demostrá ku nos a bin pa traha i nos no ta den reunion di konseho insular pa wak ken ta mihó bisti,” diputado Tjin Asjoe a bisa.

Share This
error: Content is protected !!