KRALENDIJK – Resientemente durante reunion di konseho insular a menshoná ku entrada nan di gobièrnu a keda stabil aña pasá. Hefe di sekshon di finansa Dudley Wedervoort a duna un presentashon amplio tokante e fluktuashonnan finansiero di entidat públiko (EPB) pa loke ta trata 2019.

“For di un banda e gastunan a subi, sinembargo esaki ta atribuí na kalkulashonnan tékniko relashoná ku finansiamentu ku Hulanda a duna, atraves di loke nan ta yama ‘bijzondere uitkering’. Pues a drenta for di Hulanda 29 mion na finansiamentu èkstra. E sèn ta sali bèk komo gastu di EPB. Loke a yuda oumentá entradanan di gobièrnu na 2019 tabata entre otro plakanan èkstra ku a drenta na momentu ku sekshon di finansa a hasi loke el a yama un ‘inhaalslag’, di plaka ku dos kasino riba e isla mester a paga.

Aparte di esaki a drenta 2 mion dòler ku ta kobransanan ku servisio di impuesto a yega di hasi den pasado, sinembargo en realidat  nan mester a traspasá e sèn aki pa OLB. E plaka tabatin hopi aña stashoná na servisio di impuesto. Despues ku inisialmente no tabatin klaridat kompletu riba e montante, finalmente el a bini den kaha di gobièrnu di Boneiru. Ta bon pa tene kuenta ku ta un bia so ta risibí e sèn aki. Otro entradanan ku a subi ta impuesto pa vehíkulo di motor. Esaki tin di aber ku tin mas vehíkulo riba kayanan di Boneiru, “Wedervoort a menshoná.

El a sigui bisa:” Ta notabel un oumento di impuesto di estadia di loke ta kobra turista. Esaki a oumentá ku un entrada di 3.1 mion dòler. Den su agresividat pa kobra mas plaka na impuesto di finansa, a laga servisio di impuesto saka ‘anslagnan’ taksativo pa kompanianan ku ta hür outo, basa riba loke nan tabata paga no tabata real. Sinembargo e kompanianan a bai korte i gana kaso. Esaki a pone ku entradanan di impuesto for di e sektor ei tabata 1.7 mion dòler aña pasa kompará ku aña anterior. Entradanan di ‘grondbelasting’ a keda stabil aña pasa, Wedervoort hefe di sekshon di finansa a bisa durante reunion di konseho insular. 

Share This
error: Content is protected !!