KRALENDIJK – Djarason tras di lomba, kompañá pa sekretario di USIBO, Fedebon a bishitá ofisialmente henter Bestuurscollege (gezagheber, sekretario interino i e tres diputadonan). Fedebon a trese hopi kla dilanti ku mester hasi tur esfuerso pa tene BOPEC habrí i operashonal. Bou di e lema BOPEC TIN FUTURO, a presenta un posibel solushon pa e situashon ku BOPEC ta aden i ku por lo pronto no ta mustra ku tin un solushon.

E solushon ku a keda presenta ta unu kaminda PDVSA ta keda doño di e terminal i ku un posibel kontinuashon di e operashon lo no viola e blokeo di parti di Estados Unidos i lo mester kumpli tambe ku e standardnan internashonal ku ta rekerí pa un terminal di almasenahe. Opviamente e punto kardinal ku Fedebon a trese ta mantenshon di e kuponan di trabou I ku e posibilidat pa habri hopi kupo di trabou dado kaso yega na un akuerdo pa loke ta trata “ugrading” di e terminal. Di parti di gobiernu nan a risibí e proposishon ku un mira positivo i a hasi diferente pregunta pa haña klaridat tokante henter e proposishon.

A palabrá ku e proposishon lo bai kana den e órganonan di konsulta ku Bestuurscollege a instala pa loke ta trata henter e problemátika di BOPEC pa asina analisá e faktibilidat die proposishon pa asina por primi riba e kònòpinan korekto i pa konklui ku lo mester bai un segunda tanda di kònbersashon. Fedebon na e mesun momento a hala atenshon di gobierno riba e echo pa no permití por lo pronto pa duna pèrmitnan di trabou i tambe tuma akshon pa ku trahadonan ku ta indokumentá riba nos isla i ku posiblemente ainda ta riba payroll di BOPEC.

Mirando e echo ku a trata aki di un proseso delikado, kaminda interesnan grandi ta hungando un rol Fedebon lo no por duna mas detaye di e enkuentro ku no ta te ora ku nos tin informashon konkreto. Pa loke kiko ta bai pasa despues di 30 di yüni, nos ta den un insertidumbre ya ku nos petishon pa risibí informashon tokante e escrow-account no a keda honra ya ku nos no ta partido envolví den e lisensia. Nos mester keda alerta si.

Entre tantu nos a risibí informashonnan di parti di nos hurista/konsehero sr. Hose Figaroa riba loke nos a pidié pa averiguá i ku ta informashonnan ku no por subi kaya. Fedebon kier pidi tur su miembronan pa den nan forma por laga yega na konosementu di nos mandatarionan ku BOPEC TIN FUTURO i ku ta spera di nan tur esfuerso pa tene Bopec den operashon, mirando su balor agregá grandi na ekonomia di nos isla i pa garantisá kuponan di trabou. Aun mas importante BOPEC su presensia i operashon ta na Boneiru, awor ku nos ta pasando den un krisis serio kaminda no por pèmiti pa mas kupo di trabou bai pèrdí.. 

Share This
error: Content is protected !!