KRALENDIJK – Gerald Silberie kende ta presidente di komishon fiho RNO, a papia ku notisia Live99 kaminda el a menshoná e situashon tokante 35 porshento di glas di ‘tint’ di outo. Ta’sina ku esnan ku ta forma parti di ‘Driehoek’, a trese dilanti na e komishon ku nan tin poko difikultat pa loke ta trata e glas di outo ku tin un ‘tint’ riba dje ku ta 35 porshento. “Esaki ta e midí pa loke ta trata lei nobo di tráfiko, sinembargo e ta poko difísil pa polis por ehersé su trabou. Pues nan a menshoná ku sierto momentu durante dia, no por tuma nota di e persona ku ta den e outo ku ta manehá e vehíkulo, si e tin faha di seguridat bistí si òf no. Esaki ta sosodé spesialmente atardi momentu ku solo ta bahando. Den lei nobo bèrdat e ta pone asina ku por ‘tint’ 35 porshento, i awor nos a sinta huntu pa papia i wak kiko por hasi òf kiko ta e siguiente paso pa tuma un desishon. Ta bai sinta huntu i laga hasi un investigashon pa tuma un desishon nobo. Ta trata di un punto di urgensia. E meta ta pa atendé mas rápido posibel pa polis por hasi e kontròl manera mester ta. E regla ta kontinuá aktualmente ku 35 porshento i si polis stòp un shofùr den su vehíkulo i e no ta kumpli ku e regla, ta dun’é un but pa esaki. Na momentu ku e komishon kaba hasi un investigashon, lo bini bèk konseho insular pa wak si mester adaptá e punto aki. Pa awor tur kos ta sigui meskos.

NO POR HASI KONTRÒL MANERA MESTER TA

Jose Rosales hefe di kuerpo polisial hulanda karibense, a menshoná ku nan no por kontrolá manera mester ta, pasobra e ‘tint’ riba e glas ta muchu skur. Tin outo ya ta bin ku un ‘tint’ for di fabrika, i loke ta sosodé, tin hende ta bolbe pega algu riba e glas, loke ta pone bira hopi skur. “No ta posibel pa kontrolá si e persona ta na telefon òf ta bebiendo entre otro serbes miéntras e ta manehando su outo. Meskos no por tuma nota si e persona tin faha di seguridat bistí ora e ta manehando su vehíkulo. Komo hefe di polis mi no por garantisá ku e polis por hasi e kontròl den tráfiko manera mester ta. Ta bon pa hasi un investigashon dikon na otro islanan den islanan den Karibe, ta mantené 55 porshento, i dikon na Boneiru ke hasi esaki 35, “hefe di kuerpo polisial a menshoná.

Share This
error: Content is protected !!