KRALENDIJK – Djamars último STINAPA a risibí un yamada ku posiblemente tin hende ta intentá pa kue karkó den e área di Lac. Rápidamente a manda polis, patruya di STINAPA i Marechaussee na e sitio pa tuma nota kiko ta pasando. A topa ku 3 persona ku tabatin un kantidat di karkó den nan poder. A konfiská 127 pida karkó i tur tabata ménos ku 4 aña, loke no ta permití pa saka for di laman. Ta trata di 3 persona i un di nan a logra kore bai for di e sitio.

Loke a sosodé ta un krímen, pasobra no por saka karkó for di laman den áreanan prohibí. Nos ta patruya hopi amplio pa evitá ku hende ta saka karkó for di laman. Nos ta hasi tur esfuerso pa konsientisá e hende pa no saka karkó for di lama. Ta trata di un situashon fastioso debí ku momentu ku saka tur e karkó for di den e kaska, no por hasi nada mas kuné, esta pone den laman pa e sigui biba. E kantidat di 127 karkó ta esun di mas tantu ku nos a gara durante 2020. Momentu ku gara un òf mas persona ku ta saka karkó for di laman ilegalmente, OM ta atendé ku e hende kiko ta e konsekuensia. Karkonan ku keda konfiská ta wòrdu entregá na un instansia komo donashon. E bia aki a entregá e karkonan konfiská na ‘Mental Health Caribbean’.

Pa kuementu di kref ta te despues di òktober por kue kref. Mensahe pa esnan ku ta pensa pa bai kue kref òf karkó ta bon pa tene kuenta ku no ta permití. Kref ta pone webu durante di e temporada aki, di aprel te ku òktober. Pues ta importante pa laga nan den laman ku tur trankilidat. Si stroba nan, e por tin konsekuensia serio pa futuro, kaminda por pèrdè nan eksistensia. Nos sa ku hende gusta e kosnan aki, sinembargo ta bon pa nos mes, pa no kue nan sino nos ta perhudiká tur kos ku karkó i kref nan eksistensia.

Si un persona tuma nota di algu straño tokante kuementu di kref òf karkó, por bèl na number di telefon 777-8444, 717-8444, 786-8444 òf por bèl polis i nan ta tuma kontakto ku STINAPA. 

Share This
error: Content is protected !!