KRALENDIJK – Relashoná ku “World Ocean Day” 8 di yüni, diferente boluntario a asistí djasabra último den oranan di mainta pa sambuyá i saka mas tantu artefakto posibel dañino pa e bida bou di laman. Esaki ta e di 3 aña ku ta organisá e aktividat den estrecho koperashon ku partnernan. Promé ku a drenta laman, gezaghèber Edison Rijna, havenmeester Gunther Flanegin i diputado Elvis Tjin Asjoe a dirigí palabra. Esaki a tuma lugá bou di “Plasa Machi Mimi”, pa despues inisiá ku e sakamentu di sushi for di fondo di laman.    

A saka un kantidat di entre otro plèstik i tayer di outo ku tabata na nan alkanse. Na tur masomenos 50 tayer i ainda a keda mas den fondo di laman ku tiki tiki lo bai wòrdu saká durante otro akshon. Tabata notabel un kantidat enorme di liña ku ta usa pa piska, bòter di glas i plèstik loke no ta pèrtenesé na e sitio bou di awa. Ta spera ku pronto ta regresá pa saka mas di loke a keda den fondo di laman. E limpiesa a konsentrá den e área di waf Chiku Mercelina. Gezaghèber Edison Rijna i diputado Elvis Tjin Asjoe, “Marine Park Rangers”, DCNA i diferente boluntario a kontribuí pa sakamentu di sushi for di laman. Un danki spesial na “Dive Friends Bonaire” ku a pèrkurá pa e tankinan di airu ku a yuda enorme pa e proyekto di saka sushi for di laman. Hopi importante pa kuida mas tantu posibel i no tira kos ku no ta afektá nos fondo di laman.

Share This
error: Content is protected !!