KRALENDIJK – Na opinion di suidadano Arthur Sealy, si e desishon di frakshon di Partido Demokrat pa no asistí na reunionnan di Konseho Insular ta korekto òf no ta keda na miembronan di Partido Demokrat pa diskutí e punto aki. Komo siudadano mi ta preokupá ku e forma kon dualismo ta funshoná.

Konsehal Bernabela di UPB a mustra, eksaktamente loke Clark na diferente okashon a kuestioná, ku Konseho Insular no ta haña kontesta na tempu, no ta duna ni informashon ni dokumentu pa kontrolá na un manera korekto maneho di Kolegio Ehekutivo. E kritiká aki mester pone primeramente diputado di UPB pensa i drenta akshon.

Frakshon di MPB ta ketu i ta di akuerdo ku funshonamentu di nan dos diputado. Oponentenan di DP tantu den Konseho Insular komo den komunidat ta kritiká Clark Abraham di tin e malesa di stroba kos, opstakulisá reunion i frustra miembronan di Konseho Insular.

Si Kolegio Ehekutivo no ta duna informashon na Konseho Insular kiko ta para pa pueblo. Pueblo mester sa dikon direktor interino di BHM a tuma retiru, unda e korespondensia entre diputado i direktor interino ta. Direktor di BonLab ta riba suspenshon ainda? Ken ta na kabes di BHM? Kua ta e motibu(nan) ku direktor di finansa ta bai asumí un otro posishon i ken ta fungi komo direktor na su lugá. Unda e sinku kartanan ku, segun diputado, a bai Hulanda ta? Lord Acton den siglo diesnuebe a mustra ku; Poder ta korumpí, poder apsoluto ta korumpí apsolutamente. Si frakshon di DP ta bringa e poder apsoluto e mester asistí na reunionnan di Konseho Insular.

Share This
error: Content is protected !!