KRALENDIJK – Un suidadano a presentá na redakshon di Radio Live 99.9 FM, relashoná ku un aksidente di tráfiko ku a tuma lugá 27 di sèptèmber 2019. E suidadano tabata enbolbi den e aksidente, kaminda un skuter a dal den su outo. E suidadano a konta ku e tabata riba kaya Korona direkshon pa Playa na altura di Kooyman. Un skuter a subi kaya Korona saliendo for di Kooyman pa bai direkshon di KFC. Ta trata di e skuternan ku ta transportá kuminda di un sitio pa otro.  

E suidadano a sigui konta: ”E skuter a sali mi dilanti i apesar ku mi tabata kore ku velosidat abou, un choke entre nos tabata inevitabel. Esaki a sosodé 7’or di anochi. Polis i ambulans a presentá i a atendé tur loke a sosodé na e sitio. Seguro a ofresé 450 dòler pa e daño material pa drecha e outo ku ami ta manehá.

Poko despues e shofùr di e skuter a regresá for di Kòrsou i a rekuperá di e aksidente i a indiká na su seguro ku e no tin falta. El a presentá ku un video di loke a sosodé. Seguro a tuma nota di e video i a bisa ku bèrdat e outo ta esun ku a pèrdè den e aksidente. E kos aki ta inkorekto. Solamente polis por hasi investigashon di un video. Pues loke e persona a presentá kune na e seguro i gana kaso no ta korekto. No sa kon el a yega na e grabashon. Kooyman i otro nan ku tin kamara den e área a bisa ku nan no a entrega niun video. Pues no sa di unda e persona a yega na e grabashon.

Seguro a bisami ku nan no ta bai duna mi e 450 dòler mas, paso mi a pèrdè e kaso, di loke por mira riba e video. Awor ta obligá mi pa paga seguro un kantidat di sèn, pa nan por drecha skuter di e víktima. Esaki no ta hustu i inkorekto, e persona kende tabata manehá e outo ku a aksidentá den e skuter a konta.

Share This
error: Content is protected !!