KRALENDIJK – Despues ku a bira konosí ku un empresario hulandes a kumpra Bolivia, ku ta 10 porshento di e grandura total di e isla Boneiru, awor ta sigui e pregunta kiko ta bai hasi ku e área. E plan ta pa konstruí 1.500 kas riba e tereno. E área tin un balor ekológiko grandi pa loke ta trata flora i founa. Partido D66 i SP na Hulanda ta prekupá, komo ku 3.000 hèktar di un teritorio úniko i seku, sinembargo hopi balioso ta bai pèrdí. Sekretario di estado Raymond Knops a splika “Tweede Kamer” ku plantashi Bolivia tabata i ta propiedat privá. E ta konsiente di plan ku tin pa desaroyá e área. E plan ku tin di e doño nobo, ta pa desaroyá e teritorio den un forma sostenibel, i realisá un ékis kantidat di kas. E posibel destrukshon di 3.000 hèktar di tereno úniko i seku, te asina leu ku mi sa, no ta e plan pa Bolivia, sekretario di estado Knops a menshoná.

Knops a komprondé di gobièrnu di Boneiru ku no a entrega niun plan kon ta bai desaroyá e área. Ta trata di un área kalifiká komo paisahe habri i ku kuebanan úniko riba e propiedat i otro aspektonan arkeológiko balioso, ta suheto na un régimen di protekshon spesífiko, loke Knops tin informashon ku el a risibí di gobièrnu di Boneiru. Knops a menshoná ku ta gobièrnu di Boneiru por disidí si ta duna pèrmit pa konstruí kas riba e tereno si òf no. Pues ta spera gobièrnu asumí su responsabilidat pa haya un balansa korekto entre desaroyo i preservashon di e balor di naturalesa presente na e sitio, Knops a bisa riba pregunta ku el a risibí den reunion di “Tweede Kamer”. 

Share This
error: Content is protected !!