KRALENDIJK – Trahadónan di e kompania ‘Turbo Tech B.V.’ ta hopi mal kontentu i a drenta den kontakto ku hefe di redakshon di radio Live 99.9 FM Aimed Ayubi, pa nan ekspresá nan desgusto. Nan a menshoná ku ya awor ta kasi 40 dia a pasa i nan no a kobra salario di luna di mei. “Ya ta un aña ku nos ta pasando den e situashon, kaminda nos luna tin un durashon di 40 dia òf mas. Esaki ta nifiká ku tur luna nos tin ku pasa kaminda di krus manera ta bisa, pa risibí pago di luna. Tur esaki, miéntras doño di kompania ta kore bai bin i gosa di bida manera nada a pasa. E kos aki ta un abusu i ta bon pa informá komunidat kiko ta pasando ku e trahadónan di “Turbo Tech B.V.”.  

Nos tin kompromiso fin di luna i no por kumpli kuné debí ku nos no a risibí pago for di e kompania ku nos ta traha pe,”algun di e trahadónan a menshoná. Radio Live 99.9 FM a tuma kontakto ku e kompania ariba menshoná, i a haña e siguiente kontesta. “Ta bèrdat ku trahadónan di e kompania no a risibí nan pago di fin di luna. E motibu ta, ku ta sperando kompanianan ku debe ‘Turbo Tech B.V.’, pa nan paga i manera esei ta e kaso, ta pèrkurá pa tur trahadó risibí nan salario di luna di mei,” e persona a menshoná. Esaki ta loke e ta na altura di dje i por a bisa.  

Share This
error: Content is protected !!