BONEIRU DEN UN FASE NOBO ENTRANTE AWE NOCHI 12’OR

Written by on

KRALENDIJK – Gezaghèber Edison Rijna a papia tokante un fase nobo ku Boneiru ta bai drenta entrante awe djarason anochi 12’or. “Komo gezaghèber mi a tuma algun desishon i lo papia di nan awor pa komunidat ta na altura di e situashon nobo pa Boneiru. Mayan djaweps ta kuminsá trese 130 hende for di Hulanda esta e studiantenan di awor te ku 30 di yüni. Ta tèst e hendenan na èrpòrt i nan por bai kas, i tin kontròl riba nan moveshon. Nan por sali pa hasi kompra, sinembargo si por evitá di sali kas ta mihó.  

Entrante 12 di yüni ta bai tin e asina yama ‘bùbel’ entre Kòrsou, Aruba i Boneiru. Ya un temporada a pasa i e hendenan por biaha sin mester bai karentena riba un di e islanan. Ku tur e kasonan aki mester mantené distansia sosial. Aruba i Sint Maarten tin plan pa habri pa Merka i si esei tuma lugá, no por sigui ku biahamentu entre Aruba i Boneiru. Lo sera espasio aerio pa Aruba inmediatamente. Saba i Sint Eustatius tambe ta risibí persona for di Boneiru, sinembargo e bishita ta poko mas limitá pa kantidat di hende debí ku e isla ta chikitu. Awor no tin buelo stret pa aya, sinembargo e posibilidat pa bai aya ta posibel.

No tin niun nesesidat pa prolongá e ‘nood verordering’. Tur kos ta bai ta normal entrante awe nochi na Boneiru. Por organisá torneo di deporte, sinembargo mantené entre otro distansha sosial i kumpli ku medidanan di higiena. Meskos ta konta pa turista ku bishitá e isla. Si algu sosodé, nos ta bai bèk na e situashon ku nos tabata den.

1 yüli ta habri pa risibi turistanan di Hulanda, Bèlgika, Luxemburgo, Fransia i Alemania. 1000 turista por bishita Boneiru pa siman. Un di e eksigensianan ta ku e personanan aki mester tèst negativo 72 ora promé ku bula. Si un hende lokal biaha momentu ku e regresá, mester hasi tèst ku e ta negativo. Meskos ta posibel pa bai Aruba i Kòrsou ku boto.

Si bo ta sinti algu di enfermedat mester avisá e departamentu di salubridat publiko. Mester tin seguro di malesa pa tur biahero sino no ta posibel bishita Boneiru. Si un hende bai den eksterior i no por regresá kas debí ku frontera ta sera, e mester perkurá pa e por kontinuá riba su mes responsabilidat. No tin repatriashon mas. Boneiru ta bon prepará pa kualke situashon ku por presentá momentu ku habri frontera, tabata entre otro loke gezaghèber a menshoná. 

Share This

Current track

Title

Artist

error: Content is protected !!