KRALENDIJK – Djamars mainta 10’or e konosido Ramonsito Booi, Burney El Hage i esposa a presentá na ofisina di ministerio públiko, despues ku nan a risibí un invitashon ofisial di ministerio públiko pa presentá i risibí un despensa di loke a sosodé ku ambos i nan famia.. Ámbos a drenta ofisina i kasi un ora despues a sali kontentu na mes momentu emoshoná. Radio Live 99.9 FM a papia promé ku Burney El Hage, kende a konta kiko a sosodé momentu ku nan a sinta i papia ku fiskal mayó Bote ter Steege.

“Un satisfakshon p’ami i mi famia, tambe Ramonsito Booi. Ta un satisfakshon pa Boneiru tambe pasobra loke a sosodé na 2009, tabata temporada ku tabata atendiendo ku entre otro e proseso pa Boneiru bira parti di Hulanda. Nos a hasi bon, luchando pa Boneiru tin un mihó futuro, i pa nos sorpresa a akusá nos personalmente enorme i a purba kibra nos i nos famia. Esnan ku tabata tras di tur e kosnan aki tabata buska mihó pa nan. Awe ku e despensa di parti di ministerio públiko, nos ta sera e kapítulo i kontinuá den un bida nobo. Loke a sosodé tabata algu teribel pa nos a biba kuné, un normal nobo di e tempu aya. Un hende ta inosente te dia ku prueba ku bo no ta, esaki sigur ta un satisfakshon pa nos,” El hage a menshoná.  

Despues a papia Ramonsito Booi, kende ta otro polítiko konosí den komunidat. E tabata emoshoná momentu ku el a papia i ekspresá na prensa despues ku El Hage i e a finalisá un kombersashon ku fiskal mayó.

“Mi ta kontentu ku loke a sosodé awe. Finalmente hustisia a vense. Hopi aña a pasa sinembargo awor tur kos ta kla ku nos no ta kulpabel. 11 aña a pasa i ta demostrá ku nos no ta kulpabel. Kisas awor ta lat, sinembargo mihó lat ku nunka, manera tin un dicho ta bisa. Nos 3 a papia riba diferente punto, tantu Elhage i ami, i loke nos a pone hopi énfasis riba dje ta e echo ku loke e persona a trese dilanti i ta pidi diskulpa pe, di loke a sosodé den kaso ‘Sambesi’.

E asuntu aki no a kuminsá den kaso ‘Sambesi’, e kos aki a inisiá den kaso ‘Fidji’, kaminda a yama nos  hende den struktura kriminal internashonal. Ta trata di labamentu di plaka, sèn ku nos a haña ku dilmentu di droga i asuntu di tereno ku labamentu di plaka. Nos a pidi fiskal pa limpia nos nòmber for di esaki, pasobra e no ta korekto. Meskos a akusá nos ku tin transportamentu di oro ta tuma lugá ilegalmente. Nos a pidi fiskal ku hopi fervor, pa limpia nos nòmber for di e kosnan aki. Mi tin un yu hòmber den eksterior i e no ke bin Boneiru pasobra hende ta puntr’é unda e oronan ta warda. E asuntu aki a destrosá henter famia.

Fiskal a primintí ku e ta bai atendé e parti aki. Mi señora Esmeralda Huerta tambe tabata menshoná ku tabata metí den un òf mas kos di loke nan a akusá nos di dje i mi a pidi pa atendé esei i limpia su nòmber, loke fiskal ta bai atendé. Sobra mi ta laga den man di abogado. Nos bida pa 11 aña a keda kastigá sin ningun motibu. Awor mi por bai biba bèk den mi kas, loke durante e problema nan ya menshoná, mi mester a opta pa bai un otro kas. Dios ta grandi i nos a logra e bèrdat. Pabien na tur hende, tantu mi famia i otronan. Burney El hage a bisami un bia: No ta eksistí ku bo ta bai un guera ku ta na fabor di bo lugá, sin ku bo sufri pe, Booi a tèrminá bisando hopi emoshoná i ku lágrima.

Share This
error: Content is protected !!