KRALENDIJK – Informashon ku notisia Live 99 a logra optené ta indiká ku siman pasa tabata último dia di trabou di Dudley Wedervoort, komo hefe di e sekshon di finansa di Entidat Publiko Boneiru. Wedervoort a drenta servisio di gobièrnu di Boneiru den e funshon di hefe di finansa na 2017, despues di hopi tempu no tabatin un persona fiho den e funshon. Tur e tempu gobièrnu tabata traha ku hefenan interino.

E motibu ku Wedervoort a bandoná e funshon komo hefe di finansa no ta konosí. Informashon optené ta indiká ku e ta keda traha pa gobièrnu i awor ta bai okupá un funshon den e “ofisina” di diputado di finansa i asuntunan ekonómiko, Elvis Tjin Asjoe. Komo eksperto finansiero Wedervoort ta bai traha riba e proyekto di impuesto lokal i lo ta enkargá ku proyekto ekonómiko pa gobièrnu di Boneiru.

Interesante ta ku gobièrnu no a habri vakatura pa e funshon di hefe di finansa. Pues tin indikashon ku tur probabilidat lo bini un hefe interino atrobe pa e funshon tan importante.

E funshon ta unu importante den e aparato gubernamental di gobièrnu di Boneiru, ya ku e hefe di finansa ta esun ku ta aprobá i ta firma pa tur salida di gobièrnu por tuma lugá.

Share This
error: Content is protected !!