KRALENDIJK Burney El Hage a kontesta riba pregunta di reportero di Radio Live 99.9 FM, dikon ministerio públiko ta pidi despensa i no esnan mes ku a entrega un keho falsu?

El Hage: ”Asina e sistema ta funshoná den e trabou komo ministerio públiko. Nos ta hopi agradesido ku ministerio públiko a mustra nan grandesa di a pidi nos, diskulpa di loke a sosodé, esta e investigashon riba Ramonsito Booi i mi persona. E pregunta ta interesante sigur pa loke ta trata un komunidat chikitu. Bèrdat esnan ku a krea testimonio falsu kontra nos, kiko ta bira di nan, si nan ta bai pidi despensa. Esei nan ta disidí a base di nan konsenshi.

Un hende a traha un buki di Booi i algun kos tokante mi persona, difamá nos totalmente. Normalmente den un situashon di estado di derecho, mester investigá asina bon ku na momentu ta alegá algu inkorekto kontra un otro persona, ta atendé ku bo. Esaki no a sosodé den e kaso aki, i awor despues di 11 aña no tin niun indikashon ku e ta bai sosodé.

E mester ta un lès pa otronan den komunidat pa no hasi algu asina ku un próhimo. Mi ta spera ku nos estado di derecho ta di tal forma awor, debí ku nos ta parti di Hulanda, i si ripití algu manera a sosodé ku Booi i mi persona, kaminda ta entrega keho falsu kontra hende, ta hasi algu kontra nan. Ban spera esaki sirbi komo un ehèmpel pa otro nan den komunidat,” El Hage a tèrminá bisando, despues di a sali ofisina di ministerio públiko.

Share This
error: Content is protected !!