KRALENDIJK – Djabièrnè mainta a tuma lugá un enkuentro entre stakeholdersnan manera taksista, operatornan di paseo (touroperators) i operadónan di stènt. Tópiko di e enkuentro tabata pa implementashon di ‘Tourism Recovery Plan’.  

Hennyson Thielman a hasi e parti di apertura i despues a kontinuá ku un splikashon tokante e enkuentro. El a menshoná ku e chèns ta ku mas di 60 porshento di hende lo no bai un barku krusero pa awor. Mayoria turista ku bin Boneiru awor ta bai ta e sambuyadó. Tin ku plania kon pa trese otro tipo di turista pa hasi otro tipo di aktividat riba e isla. Nos mester krea mas posibilidat pa e turista ku ta bishita Boneiru gasta mas sèn, Thielman a menshoná.

Despues a papia diputado Elvis Tjin Asjoe. El a menshoná entre otro kon pa start i atendé e mundu krusero na Boneiru despues ku e ‘coronavirus’  a krea un paro mundialmente. Seguidamente a dirigí palabra Gunther Flanegin. “Mester wak kon pa sigui ku turista di barku. No por atendé si tin hopi hende ku e vírùs na Boneiru den un tiru. Pa e motibu aki mester wak kon ta bai atendé ku barku na Boneiru, momentu ku nan regresá den funshon. Awor despues di tres luna último barkunan a yega tera. Hopi desgustu tin  relashoná ku krusero, e forma ku a trata esnan ku a keda riba barku i no por a yega niun kosta pa motibu di e problema di ‘Covid-19’. Sigur esaki tin impakto negativo pa e mundu krusero. Diferente krusero ya a kanselá nabegashon pa 2020. E rísiko riba barku ta haltu pa plamamentu di un vírùs. Probablemente pa e aña aki lo no bin barku Boneiru. E agensia di barku di Pullmantour probablemente por regresá Boneiru na luna di novèmber. Ta bon pa kuminsá prepará pa e turista ku ta bai keda algun dia na Boneiru, entre otro Flanegin a menshoná.  

Share This
error: Content is protected !!