ERNST DELANOY: ”DIKON NO POR KUE KARKO PAFÓ DI LAC I SOROBON?”

KRALENDIJK – Radio Live 99.9 FM a papia ku Ernst Delanoy kende ta presidente di ‘PiskaBon. El a papia tokante sakamentu di karkó for di fondo di laman. “PiskaBon ta para pa protekshon, piskeria duradero, pa kuida pa mayan tin mas piská. Nos ta sostené ‘STINAPA’ ku ta protehá i kuida nos medio ambiente.

Karkó ta protehá na Boneiru ya pa hopi aña. Promé a menshoná ku pa algun aña ta bai protehá karkó, sinembargo e protekshon a kontinuá i no tin un fecha ku no ta protehá nan mas. Piskabon no tin problema ku protekshon di karkó den e área di Sorobon i Lac. E bahia aki ta probá ku den e área debí ku e laman no ta hundu, karko ta usa e sitio pa reprodusí, esta pone webu i haña yu manera ta bisa. E karko chikitu ta krese i sierto momentu esun yòn ta bai laman hundu. Den bahia di Lac i Sorobon tin hopi karkó chikitu, debí ku nan no a krese sufisiente pa nan bai kaminda laman ta mas hundu. Pa e motibu aki ‘STINAPA’ tin rason pa protehá e karkó.

Loke sí Piskabon no ta di akuerdo, ta ku no por kue karkó ku ta madurá na otro sitio. A bai gobièrnu di Hulanda i di Boneiru pa atendé esaki i no a yega na un klaridat. No tin un argumentu dikon no por kue karkó pafó di Lac i Sorobon. A hasi solamente investigashon den e área di Lac. Pues e prohibishon pa kue karkó ta válido pa e área di Lac i Sorobon. Tin otro área ku tin hopi karkó, sinembargo no ta pèrmití pa kue nan.

Piskabon no tei pa molestiá, sinembargo pa yuda huntu pa buska solushon sea pa protehá òf pa mihó na bienestar di tur hende. E posishon ku mi a tuma ta unu ku mi mester sa tokante e situashon, entre otro asuntu di kue karkó. Si mi no tin kontesta pa bisa e hende dikon e no por kue karkó sierto área, e kos no ta funshoná. Mi mester por splik’é e motibu i unda si e hende por kue karkó. No por stòp kuementu di karkó. Nan ta sigui hasié. Ta bon pa nos bin ku un bon maneho i ku tur rèspèt nos ta komprondé i respetá otro pa un mihó pa nos mes,” Delanoy a bisa.  

Share This
error: Content is protected !!