KRALENDIJK – Djarason promé bia a organisá un aktividat ku a karga e nòmber ‘Bonaire Black Lives Matter’. Ta trata di un aktividat pa manifestá kontra deskriminashon di hende. Organisadó di e aktividat tabata Guerlian Gougon i durante e atardi te anochi, diferente persona a dirigí palabra den Parke ‘Wilhelmina’ kaminda e aktividat a tuma lugá.  

“Debí ku na Boneiru tin hopi abusu ta tumando lugá den komunidat, ta momentu pa nos stòp e kosnan aki. ‘Bonaire Black lives Matter’ a lanta i ta sosten’é e hende di kolo. Ta konosí ku nan ta rekonosé nos ku ta kai bou di Hulanda, kende ántes tabata katibu, komo hende ménos rekonosé. ‘Black Lives Matter’ na Boneiru tin derechi di eksistensia. No tin 10.000 hende awe presente, sinembargo si tabatin 1 hende ta satisfasémi sufisiente pa kontinuashon. Asina mi ta kontinuá pasivamente, pa nos logra hopi mas ku boso sosten. Nos no ta bai destruí nada den kaya. Nos ta hasié pasivamente,” Gougon a menshoná i el a risibí un fuerte aplouso pa loke el a papia.

Despues a papia un hóben di Dans School Dancesensation, Angelique, kende a menshoná entre otro ku nan ta presente pa demostrá muchanan di skol. “Huntu nos ta pará pa ‘ Black Lives Matter’, awe i pa semper,” el a menshoná.  

Seguidamente a papia diputado Nina Den Heyer, kende a menshoná ku ta bon pa nos para dilanti un spil. “Para dilanti un spil i realisá kon nos ta trata e chines i haitianonan. Meskos ku nos ta deseá pa otro respetá nos, ta bon pa nos tambe respetá otro, tabata entre otro loke diputado den Heyer a menshoná. El a risibí fuerte aplouso di loke el a bisa. A dirigí palabra despues Arjen De Wolf, i entre otro el a menshoná ku tin bes den nos sanger e ta pa deskriminá otro. “Mi ta apresiá esnan tras di a organisashon, sigur esaki ta un bon meta.

Sedney Marten tabata otro persona kende a dirigí palabra e atardi. Hopi outo nobo riba Boneiru, sinembargo kiko di e hende mes? Edifisio nobo, protekshon pa animal i mas. Kiko di e hende mes? Sèn a kambia di florin pa dòler, sinembargo e salario a keda na florin, “tabata loke ku el a amplia riba dje.

Despues a papia polítiko Clark Abraham di partido ‘Demokrat’. “Hendenan di pafó ta hasi kos pa nos. Nos tin ku hasié huntu. Nos tin ku hasi kos, i si nos no hasi nada, nos ta kómplise di loke sosodé. Loke a sosodé ku George Floyd na Merka, mester tene kuenta kuné. Un hende a filma loke a sosodé, sinembargo na Boneiru tambe e ta pasa. Nos tambe ta kómplise di deskriminashon. Ta bon pa yama e chines na su nòmber, puntr’é su nòmber i stòp di yam’é ‘chino’. E tin su nòmber. Meskos ku abo no ke pa nan deskriminábo, no hasié ku otro

.
Despues Gougon a pidi tur presente pa hinka rudia pa 8 minüt i 46 sekònde, pa imaginá kiko a sosodé momentu ku a abusá di George Floyd na Merka.
“Esaki nunka mas por lubidá ku bo tabata na rudia. Djis pensa ku e rudia aki riba bo garganta. Nos tin derecho,” Gougon a menshoná na tur presente.,”.

Share This
error: Content is protected !!