KRALENDIJK – Djabièrnè 12 di yüni e promé pasaheronan for di Kòrsou a yega Boneiru despues ku frontera tabata será pa kasi 3 luna debí na e pandemia di COVID-19.

Un asina yamá bùbel a wòrdu kreá entre islanan ABC. E bùbel ta ilustrá e islanan ku na e momentunan aki por biaha pa i for di dje i ta liber di peliger pa posibel kasonan di ‘Corona Vírùs’.

Pasaheronan for di Kòrsou, Aruba, Saba i Sint Eustatius ku bishitá Boneiru por move liber i no mester bai den karentena. Sinembargo mester apliká e regla di entre otro distansia sosial i higiena. Meskos ta konta pa pasaheronan di Boneiru ku bishitá e islanan aki.

Tur ta keda informá ku si nan tin kualke keho di salú relatá na COVID-19, mester mèldu esaki inmediatamente na e departamentu di salubridat públiko.

Na yegada di e promé pasaheronan for di Kòrsou na aeropuerto Flamingo, nan a keda sorprendí ku un kaluroso bonbiní i a risibí un tas di rekuerdo di nan bishita na nos isla for di man di empleadonan di ofisina di turismo (TCB).

Djaluna 15 di yüni Aruba ta habri frontera pa islanan ABC i por spera e promé pasaheronan for di e isla aki djaluna pues. Intenshon ta na momentu ku Aruba kuminsá risibí pasaheronan for di Merka 10 di yüli, pa sera e espaseo aerio bèk i no lo risibi niun pasahero for di Aruba.

Outoridatnan na Aruba a informá ku tur turista ku yega e isla mester chèk temperatura, hasi un entrevista chikitu riba sintoma, i hasi un rapid-tèst. E turista tin di paga $75 pa e tèst. Despues tambe e tin di tuma un seguro di Covid pa su estadia na Aruba. Esaki ta kosta $15 pa dia. Sinembargo segun informashon no ofisial, esaki no ta konta pa pasaheronan for di Boneiru i Kòrsou.

Share This
error: Content is protected !!