KRALENDIJK – Relashoná ku e kaso di djasabra anochi kaminda polis a informá ku a enkontrá un dama malamente heridá benta abou na kaya Kalipso, e sospechoso enbolbí a entregá su mes awe mardugá na warda di polis. Ta trata di e hòmber di inisial J.G.G.G di 34 aña di edat.

Di informashon ku notisia Live99 a logra optené i ta disponé di dje ta indiká ku e kaso tin un rabu largu i no ta simplementente a enkontrá e dama heridá bentá abou na e kaya ariba menshoná.
Djasabra anochi pa mas o menos 9’or, outoridatnan polisial a keda dirigí ku urgensia pa Nikiboko na altura di un snèkbar chines.

Un hòmber Venesolano kedando di forma ilegal aki na Boneiru mester a maltratá i hinka un dama ku e ta kompartí bida kuné ku un ‘ijspiek’, pa despues bandoná e sitio na pia. Personanan ku tabata den serkania ku a mira loke ta pasando a kore bai separá i skapa e dama di risibí mas hinká. Ambulans ku a presentá rápidamente na e sitio a transportá e víktima ku urgensia pa hòspital kaminda ketubai e ta interná.

Outoridatnan kontinuando ku e investigashon a start un buskedá den e area pa buska e hòmber sospechoso. A risibí informashon ku e hòmber a kana drenta un dam den bisindario pero no a logra di topa kuné. Tabata awe mardugá ku e hòmber a presentá na warda di polis pa entregá su mes. Mas aleu mester bisa ku varios bia famia i e propio pareha di e hòmber aki a entregá keho di maltrato na outoridat pero nada no a wòrdu hasi.

Un kaso serio i lamentabel ku no mester a yega asina leu si outoridatnan a aktua abase di kehonan ku tin entregá kontra e hòmber Venesolano. E kaso ta sigui bou di investigashon.

Share This
error: Content is protected !!