KRALENDIJK – Robert “Oby” Winklaar, por sierto di e bario di Nort Saliña, despues di a firma djaweps último, ta e Direktor Tekniko nobo di s.v. Estrellas. Oby a primintí di hiba su ekipo di bario den e tòp-timnan den kampionato di FFB e próksimo temporada ku lo kuminsá mui probabel den luna di ougústùs próksimo.

Manera ta konosí sr. Robert “Oby” Winklaar, últimamente a entregá su karta di retiru na direktiva di e kampionnan di S.V. Real Rincon di Rincon. Tabata fo’i na prinsipio di e último temporada, ku sr. Winklaar a duna di konosé na e direktiva ku lo ta su último temporada.


Mirando e último desaroyonan den su ekipo di bario, tabata motibu aun mas pa uni su mes un bia mas ku su ekipo di s.v. Nort Saliña.
Direktiva di s.v. Estrellas a habri kombersashonnan ku sr. Winklaar tokante esaki, di kua djaweps último a yega asina leu den forma di un akuerdo, loke ku a keda firmá pa formalisá esaki ofisialmente.


E akuerdo a keda firmá djaweps último unda ku promé ku esei, durante un enkuentro ku nos di e emisora aki tabata e únikonan ku tabata presente komo prensa, a hiba palabra e presidente di s.v. Estrellas, sr. Ricardo “Kado” Alberto, siguí pa su visepresidente/bosero, sr. Robert Sances, sekretaria sra. Gloria Thomas-Wanga i por último sr. Robert “Oby” Winklaar.


Di parti di s.v. Estrellas nan tur ku a hiba palabra, a yama Oby bonbiní bèk na kas. Nan a mustra nan satisfakshon i ta sumamente kontentu i satisfecho ku a haña bèk un DT di e klase di Oby Winklaar, i mas ku tur kos, un DT di nan propio bario ku konosé tambe e hungadónan di s.v. Estrellas.


Oby ta un DT ku tabatin sigur éksito ku e kampionnan di s.v. Real Rincon.
Tur hende konosé Oby komo un DT serio ku konosé su trabou i ku sa kiko e ta hasi pa logra éksito i lo máksimo den kampionatonan di futbòl lokal i tambe enkuentronan internashonal.

Konosiendo Oby Winklaar, loke ta spera di dje i loke e mes a bisa tambe den su diskurso, ku e lo trata na hiba su ekipo di su bario den e ekiponan “tòp” di kampionato di futbòl di FFB. Na final Oby a bisa ku un di e motibunan prinisipal ku e ta bèk ku e ekipo di Estrellas, ta ku e ta bai saka kara prinsipalmente di su bròder Enoc ‘Nòki’ Melaan (QEPD), na bida su bon amigu i entrenadó di e ekipo di kunuku bieu.

Nos ta deseá tantu sr. Robert “ Oby” Winklaar komo tambe s.v. Estrellas, tur pero klase di éksito den e próksimo temporada di futbòl ku lo kuminsá mui probabel den luna di ougùstùs benidero.

Share This
error: Content is protected !!