KRALENDIJK – Ben Oleana kende ta eks direktor di Bonaire ‘Holding Maatschappij’ (BHM) a papia tokante e asuntu di e kompanianan. “Awe ta último bia ku mi ta papia di e asuntu di BHM. Mi tin responsabilidat pa papia di e asuntu aki, pa komunidat sa kiko tabata i a sosodé. Mi ta papia pasobra mi no ta keda ketu i ta kómplise ku loke ta inkorekto. E kos a kuminsá kaminda mi a drenta BHM, i tabata Anthony Nicolaas kende a dunami pabien pasobra a nombra Burney El Hage i mi persona den komisariado di BHM. Mi no tabata na altura ku mi ta den e posishon. Sí mi a manda un karta ku petishon, sinembargo mi no tabata na altura ofisialmente ku nan a nombrami den BHM. Despues di kòmbersashonnan mi a kuminsá ku e tarea na BHM.

Mi a risibí dokumentunan i a kuminsá lesa i tuma nota di tur kos. Solamente si bo ta den posishon komo direktor ta posibel pa tuma desishon den BHM. E momentu ei mi a pasa e proseso pa mi por a bira direktor pa por a aktua. Promé kos mi mester a hasi tabata buska hunta di komisario pa e kompanianan, esta Selibon, BonLab, TCB, TELBO i BOG. Huntu ku Burney nos a parti tarea i a kuminsá ku e trabou. Esaki mester a tuma lugá rápido. A pasa tur e proseso i tabata difísil pa haña hunta di komisario. Mester a tene kuenta ku hopi kos pa e hende por okupá e funshon. Yanüari 2020 no a nombra e hendenan. Gobièrnu a bisami mester motivá kada persona e motibu ku a skohe nan pa e tarea den hunta di komisario. Nos a buska un persona spesial pa yuda ku esaki. A hasi tur proseso i kos a keda pega pa por nombra hunta di komisario di e kompanianan ariba menshoná. A keda skùif e proseso kada bia ku algu pa no nombra e hendenan siendo tur kos tabata kla.

Nos a manda 4 karta pa pidi pa nombra hunta di komisario di e kompanianan. Tabatin algu ku mester a paga gastunan di lus di stadion. BC a atendé i esei no ta mi responsabilidat. Gobièrnu huntu ku gezaghèber mester responsabilisá loke a paga. Mi a manda un karta i a splika loke a sosodé, ku ami no por papia pa nan. Despues di e problema aki un otro a presentá. Trahadónan di ‘BonLab’ a presentá i a konta di nan problema. 1 di mart a aprobá i firma pa e hunta di komisario pa ‘BonLab’. Awor ta den proseso pa saka afó si na ‘BonLab’ tabatin bon òf no bon maneho. Na final lo determiná esaki.

Kos a kontinuá kaminda ainda no a nombra hunta di komisarionan di kompania i wak pa e kuenta anual ta kla. A yega sierto momentu, mas o ménos 4 siman pasa, i mi a bisa te aki mi ta yega. Si no regla e kosnan mi ta bai (TIG KOMESIE). Mi a sigui sinembargo miéntras tantu nada a sosodé. Mi a manda un karta pa tur esnan konserní pa loke ta trata loke mi ta hasi komo direktor di BHM.

Mi a tuma desishon pa stòp, pasobra mi no por traha ku un maneho asina. 6 luna mi a okupá e funshon, un trabou inmenso. Mas ku 60 ora di trabou. Mi tabata gana 5.300 dòler, trahando na BHM, djasabra i djadumingu. 4000 dòler mi tabata risibí den mi man. Tur gobièrnu tin falta den e situashon kaminda no tin direktor pa e kompanianan ariba menshoná. Den loke nan ku ami a tuma nota di dje ta ku tin hopi gastu innesesario ta tuma lugá. Entre otro asuntu di telefon i gastu di gasolin ta hopi haltu loke no tin mester.

Mester di maneho pa stòp e tipo di kosnan aki. Ami a hasi mi parti korekto i responsabel. Meskos ta e kaso ku loke mi ta hasi na Fundashon Cas Boneriano, kaminda mi ta hasi tur kos bon den un tim. Nos ta traha huntu den bon harmonia i kos ta bai den bon direkshon. Hopi problema tabatin i nos a lucha pa stabilisá e situashon, “e eks direktor di BHM Ben Oleana a menshoná.

Pa bolbe skucha e programa, klik aki:

Programa Brunch 99 #15/6/2020

Programa Brunch 99 #15/6/2020

Posted by Live99FM Bonaire on Monday, 15 June 2020
Share This
error: Content is protected !!