KRALENDIJK – Pa selebrá e di tres aña di Boneiru komo un “Blue destination”, djasabra último den oranan di mainta e grupo di “taskforce” a djòin forsa huntu ku One Hour Clean Up Power, Junior Rangersnan di STINAPA i un kantidat di boluntario pa limpia kosta di Playa grandi. Entre otro por a tuma nota di presensia di diputado Nina den Heyer, diputado Elvis Tjin Asjoe huntu ku nan personal di ofisina i Miss Tourism 2019 Rayshantaly Coffie komo boluntario.

E grupo di “taskforce” di Blue Destination ta organisá diferente aktividat ku e meta pa konsientisá e pueblo Boneriano pa partisipá aktivamente den inisiativanan pa mantené Boneiru komo un Blue Destination.

Riba e di tres aniversario di Boneiru komo un isla “Blue”, Nashonnan Uní ta selebrá Dia Mundial di Oséano i den kuadro di esaki riba djasabra 13 di yüni a tuma lugá e “One Hour Clean Up” na Playa Grandi. Warehouse Supermarket a sòru pa un kantidat di ko’i bebe friu pa boluntarionan i Selibon NV a sòru pa baki grandi pa depositá shushi aden. Djasabra awó e akshon di limpiesa lo kontinuá na e mesun sitio i tur ku ke bin duna un man ta bonbiní.

Share This
error: Content is protected !!