SEKRETARIO DI ESTADO RAYMOND KNOPS A MANDA KARTA KU PUNTO FUERTE PA GOBIÈRNU DI BONEIRU

KRALENDIJK – Sekretario di estado Raymond Knops resientemente a skirbi un karta pa gobièrnu di Boneiru, esaki despues ku eks direktor interino di ‘Bonaire Holding Maatschappij’ (BHM) Ben Oleana, a manda un karta pa informá Knops di e situashon di kompanianan di gobiernu. Den e karta ku Oleana a manda pa Knops e ta splika ku kompanianan di gobièrnu ta dominá pa politikonan, loke ta e motibu ku e kompanianan no ta funshoná manera mester ta. Knops ta menshoná na gobièrnu di Boneiru ku e ta konsehá pa atende e situashon di e kompanianan ku firmesa i huntu ku stakeholdernan tuma e mando i traha pa mehorá e maneho di kompanianan di gobièrnu. Tambe el a pidi gobièrnu yena e vakaturanan di e komisariadonan di e kompanianan i pa pone e atministrashon finansiero di e kompanianan na ordu di un forma diligente. Segun sekretario di estado, esaki mester ta na bienestar di e funshonamentu di kompanianan di gobièrnu i e kalidat di servisio ku nan mester duna na habitantenan di Boneiru.

Raymond Knops ta bisa gobièrnu di Boneiru ku e ta skirbi e karta pa gobièrnu pa motibu ku ta gobièrnu ta esun ku mester pèrkurá pa bon maneho den e kompanianan di gobièrnu i komo representante di akshonista di e kompanianan. Knops ta bisa den su karta, ku e ta skirbi pa motibu di e diferensia di opinion ku tin entre gobièrnu i e direktor interino di BHM. E sekretario di estado ta skirbi tambe di kartanan ku el a risibí di BHM dianan 14 i 28 di aprel último.

Den media Knops ta bisa di a tuma nota di diferensianan di pensamentu entre gobièrnu i e eks direktor interino temporal. Tur dos tin nan responsabilidatnan diferente i esaki por kondusí na diferensia den punto di bista.

Den relashonnan di gobernashon, i sigur riba un isla chikitu manera Boneiru, Knops ta bisa ku ta importante pa atendé diferensianan na tempu.

E ta sigui menshoná ku e no ke bai den detaye di e diferensianan di punto di bista.

Knops ta skirbi gobièrnu ku ta na Bestuurscollege pa tuma e mando, pèrkurá pa bon maneho i atendé diferensianan di opinion ku e kompanianan. E ta bisa ku di Kolegio Ehekutivo e ta spera un maneho firme i konsistente pa yega na solushonnan. Ta p’esei, tambe riba su petishon, representante di reino interino a hasi intento pa stimulá pa atendé e asuntu na e manera korekto.

En general Knops ta bisa ku e ta kompartí e preokupashon ku tin tokante e maneho i e finansa di e kompanianan di gobièrnu di Boneiru. Ta p’esei Knops ta bisa ku el a firma un “Bestuursakkoord” fin di 2018 ku gobièrnu di Boneiru, ku sosten di Konseho Insular. Den esaki tin palabrashon tokante mehorashon di e funshonamentu, struktura i “Cheks and balances” den “corporate governance” na Boneiru. Esaki ta i lo keda un prioridat, segun sekretario di estado Raymond Knops den su karta dirigí na gobièrnu di Boneiru.  

Share This
error: Content is protected !!