KRALENDIJK – Ernst Delanoy presidente di “Piskabon” a papia tokante situashon di entre otro bui i ‘slepwei’. “No tin fondo pa por kumpli ku plannan ku tin. Nos a primintí miembronan diferente kos, manera buinan i ‘slepwei’. Tin 6 bui kla pa bai den laman ku Hulanda a supsidiá. E famia di e kompania Don Andres ta di akuerdo pa duna nan koperashon pa pone e buinan den laman hundu i leu. E problema di ‘covid-19 a pèrkurá pa stanka e desaroyo. E kosnan ta kana den bon direkshon pa kontinuashon.

E otro problema i diskushon ku tin ketubai ku gobièrnu ta e asuntu di ‘slepwei’. Un situashon fèrfelu pa piskadónan i doño di boto. E hende ku tin un boto i ta deseá pa bai laman hopi bia pa plaser òf piska, sinembargo no tin un sitio adekuá i seif pa baha boto den laman. Nos a trese e problema aki na diferente okashon na gobièrnu, hopi papiamentu sinembargo nada den práktika. Si “Piskabon” tabata risibí supsidio di gobièrnu, nos mes por a realisá e proyekto aki. 2 aña tras di otro nos a entregá papel di petishon pa risibí supsidio, sinembargo tur dos bia nos a keda informá pa manda petishon di nobo komo ku papelnan a pèrdè.

Algun persona ku a kansa di warda riba gobièrnu a bin ku e idea pa traha algu di nan mes, esta un ‘slepwei’ riba nan propio gastu. Esei ta bon, sinembargo ta responsabilidat di gobièrnu pa hasié. A presentá na gobièrnu un sitio adekuá pa traha e ‘slepwei’ pegá ku Marriot Hotèl i Plaza Hotèl. Te dia di awe no a bai di akuerdo.

Awor gobièrnu a proponé un otro sitio ku ta den bisindario di Playa Lechi ‘Den Laman’. Mi ta duda ku e sitio aki ta adekuá, mirando ku aya banda tin diferente regla, ref ku ta protehá ku mester tene kuenta kuné. Pues asina ta sigui warda, miéntras e piskadó ta sufri. Mi ta sigui ku pasenshi i spera nos ta logra pronto. E sekretaria nobo di diputado James Kroon, sra Emer ta hasiendo un bon trabou, i tiki tiki bos di buriku lo yega shelu,“ Delanoy presidente di ‘Piskabon’ a bisa.   

Share This
error: Content is protected !!