KRALENDIJK – Suidadano Boneriano Jeffrey Levenstone ta atvertí ku turismo di kalidat, e direkshon ku ke hiba Boneiru su turismo, por bai hasi bida di e Boneriano karu, difísil i kasi imposibel. Ta di vital importansha pa definí di forma kla, kiko nos mester kompronde bou di turismo di Klase i habri dialogo ku pueblo tokante di e deseo of vishon aki sin lubidá di analisá kiko e posibel kónsekuensianan di esaki, lo ta pa e suidadano.

Ultimo tempu nos ta tende atrobe ku Boneiru mester bai direkshón di turismo di klase of turismo di kalidat. Aparentemente e pandemia di Corona-virus lo mester ta e momento ídeal pa drai e yabi i drenta kaya di turismo di klase of turismo di kalidat. E motibu dikon mi ta menshona tur dos, esta klase i kalidat ta pasobra te na e momentunan aki e asuntu aki a keda na un gritu ku no a wordu substansia.

Na mi manera di mira kos, gobiernu ta representa i ta traha na bienestar di su pueblo. Esaki ta ensera ku ora ku gobiernu bini ku un pensamentu ku ta ensera direkshón di su pueblo, e gobiernu ei tin e obligashon moral di informa su pueblo debídamente i skucha e reakshon ku pueblo ta duna su gobiernu. Ora ta trata e fenómeno di turismo di klase of turismo di kalidat, mester kuminsa na defini eksaktamente kiko bo ke men. Bo ke men turista ku tin un grado haltu di edukashon i ku ta trese adelanto sin ku esaki ta kibra norma, balornan i/of imagen di e isla?, of bo ke men turismo di hende ku plaka? Ta dos kos diferente, no ta e mesun kos.

Kon bo ta instituí un sistema ku ta pone ku hendenan ekonómikamente fuerte so ta bini bo isla? Tur país of isla na mundo ku a skohe pa un of otro forma di turismo di klase a realisa esaki dor di adaptashon di lei. No tin otro manera.

Un ehempel; si na Boneiru bo ta paga $10 pa un tag ku ta duna derecho pa usa nos laman, esaki lo mester bira $1000,- E meta tras di e adaptashon nan aki ta pa hasi e fasilidatnan asina karu ku ta turistanan ekonómikamente fuerte so por paga esakinan. Esaki ta loke ku Boneiru no a skohe na januari 2011 na momento ku mester a skohe entre doller merikano i euro pa ta nos moneda. E argumento kontra euro tabata ku Boneiru lo a hasi su mes demasiado karu pa e suidadano i e bishitante.

Ta importante pa ilustra ku tur e isla of paisnan aki , ku a hasi tal eskoho, a hasi bida di nan suidadanonan imposibel. Esaki ta un konsekuensha logiko si nos tene na kuenta ku e suidadano tambe ta hasi uso di e fasilidatnan aki.

Rondo di nos tin ehempelnan kla di e fenómeno aki. No mester bai masha leu. Hopi biaha nos ta papia ku ferfor riba e islanan aki. Sin embargo nos ta ignora e echo ku riba e islanan aki, habitantenan mester tene dos trabou pa por logra un kalidat di bida mas of menos akseptabel pa mi no bisa ku nan ta sobrebibiendo. Di dia pa dia.

Finalmente mi ke laga bon kla ku ami no ta ni kontra ni na fabor di e pensamentu aki. Lo ke si mi ta kere ta importante pa pueblo den su totalidat ta partisipe den e kambio di vishon aki. Al fin i al kabo, ta pueblo ta esun ku mester biba ku e konsekuensianan di esaki. Bon of malu.

Share This
error: Content is protected !!