KRALENDIJK – Na aña 1975 riba insistensia di e líder di Rincon Fransisco “Broertje” Janga a establesé e terminal di BOPEC pa almasená produktonan petrolero. E aña aki BOPEC lo kumpli pues 45 aña di eksistensia. Ku tresementu di BOPEC na Boneiru ekonomia di Boneiru a drenta un era nobo. Hopi ta e trahadónan ku a gana nan pan di kada dia i ku te awe ta gana nan pan di kada dia. Hopi a baha tambe i ta gosa di un penshun bon meresí.

Ta konosí tambe ku BOPEC ta pasando den tempunan hopi difisil komo konsekuensia di e sankshonnan imponé pa Gobièrnu Merikano i sostené pa gobiernu Hulandes. Banda di esaki for di despues di 10-10-10 ministerionan hulandes a pone kondishonnan severo pa loke ta seguridat di e terminal, naturalesa i e personal ku ta laborá na BOPEC,

Konsekuensia di e medidanan aki ta ku ya pa basta tempu no tin barku ta yega BOPEC, pues e negoshi ta pará ketu. A pesar di esaki PDVSA komo doño di BOPEC a keda kumpli ku su obligashonan pa ku e trahadónan te ku dia di awe.

Pregunta grandi ta BOPEC TIN FUTURO.???

Pa nos por kontestá e pregunta aki e sindikatonan BPWU, representando e trahadónan di BOPEC. FEDEBON, representando e staf di BOPEC i sostené pa USIBO ta organisá un atardi/anochi di INFORMASHON pa tur trahadó di BOPEC i nan famia i tambe henter pueblo boneriano.

Durante e reunión aki lidernan lo duna amplio informashon tokante e situashon di BOPEC pa asina komunidat mes husga ku BOPEC TIN FUTURO, ora ku duna informashon kiko ta e konsekuensianan si BOPEC no kontinuá i kiko lo ta e benefisionan ku BOPEC sigui ku su operashon aki na Boneiru.

Pa tal rason un invitashon ta bai pa tur trahadó di BOPEC i nan famia i tambe na henter komunidat boneriano pa bin na e atardi/anochi di informashon ku lo tuma lugá riba tereno di Kas Sindikal di AFBW, situá na skina di Kaya Korona, Kaya Neerlandia pa mitar di seis di atardi (5:30pm).

Sindikatonan BPWU, FEDEBON i USIBO ta hasi un apelashon riba tur kolega sindikatonan den USIBO pa hasi un yamada na nan miembronan pa nan tambe asistí na e atardi di informashon aki.

Igualmente ta pidi henter komunidat boneriano pa bin tuma informashon pa asina nan por forumulá nan propio opinión.

Share This
error: Content is protected !!