KRALENDIJK – Djamars a tuma lugá entrega di e promé tarheta di deskuento pa miembronan di AFBW ku hasi kompra na ‘Lovers Ice Cream Parlor Bonaire’. 

Cherel Kwidama, presidente nobo di sindikato ‘AFBW’ a papia tokante loke a tuma lugá. “Loke a sosodé awe ta un parti di e reorganisashon di ‘AFBW’. Ta trata di un tarheta di miembresia i ‘Lovers Ice Cream’ ta e promé negoshi ku ta bai duna un deskuento na tur miembro di ‘AFBW’ ku hasi kompra na e establesimentu. AFBW ta un federashon ku mas o ménos 400 miembro i tur por hasi uso di e karchi momentu ku nan kumpra algu na ‘Lovers Ice Cream’. Nan ta haña un deskuento di 10 porshento. E idea ta pa buska mas negoshi i kompania ku ke duna rebaho na miembronan di AFBW ku e tarheta di miembresia. Nos ta bai atendé awor ku supermerkadonan, lugá ku ta bende paña i mas. Den e temporada ku nos ta bibando aden, nos ta mira ku tantu e negoshi por haña mas kliente i e persona ku ta hasi kompra por haña un deskuento, loke sigur ta yuda ekonomia i suavisá e situashon. AFBW ta gradisí Lovers Ice Cream pa aseptashon di e proyekto aki i ta enkurashá otro negoshante nan pa nan tambe por forma parti di e proyekto. Den e situashon aki kada dòler ta yuda, “Kwidama presidente di AFBW a menshoná na Radio Live 99.9 FM.

Propietario di Lovers Ice Cream Parlor Bonaire, sr. Jarrod Dijkhuizen, a konta kon a yega na e idea di e karchi di deskuento. “Hopi empleado di Fundashon Mariadal ta bin kumpra eiskrim i mi a bisa nan si nan ta bin ku grupo grandi di hende, nos por duna deskuento. Despues di algun dia mi a haña bishita di hendenan di ‘AFBW’, i nos a sinta na mesa pa wak kiko por yega na dje. Nos a deliberá i asina e idea a nase pa traha un karchi i momentu ku miembronan di ‘AFBW’ kumpra kos na ‘Lovers Ice Cream’, nan  ta haña 10 porshento di deskuento. No solamente e miembro di ‘AFBW’ ta risibí deskuento. Si e miembro bini ku algun persona ku no ta miembro di AFBW, nan tambe ta gosa di e 10 porshento di deskuento. Boneiru i mundu kompletu ta den un situashon ku no ta hopi rendabel. Na Boneiru no tin turista aktualmente. Mi ta spera hopi mas negoshi ta bai partisipá na un karchi manera esaki, ya asina duna un deskuento na e kumpradó. ‘Lovers Ice Cream’ ta e promé, i mas negoshi mester djòin i huntu nos ta kontinuá ku bon resultado pa ekonomia,” Dijkhuizen kende ta propietario di ‘Lovers Ice Cream Parlor Bonaire’ a bisa.

Riba potrèt entre otro momentu ku e promé persona a hasi uso di e tarheta di miembresia pa risibí deskuento serka propetario di Lovers Ice Cream kompañá pa Saphira Janga, kende ta representante/shopsteward di ‘AFBW’.

Share This
error: Content is protected !!