KRALENDIJK – 8.1 mion dòler ta loke gobièrnu a finalisá 2019 kuné. E resultado finansiero aki por dedusí for di un presentashon ku diputado Elvis Tjin Asjoe a tene den reunion di komishon di konseho insular resientemente. Departamentu di finansa a kuminsá e trayekto di kuenta anual 2019 den luna di desèmber, mandando ‘email’ pa direktoradonan ku mester duna aporte na e sekshon di ‘Kerngegevens’. Na luna di yanüari a inisiá e kontròl i korekshon nesesario di sifranan. Atministrashon di finansa a sera 14 di febrüari i dia 27 di e luna a finalisá tur trabou i a manda e dokumentunan pa akountent. E tin di akountent a bini Boneiru e promé siman di luna di mart pa duna kontinuashon na nan kontròl di fin di aña. Na e momentu ei tabatin un resultado positivo di 7.1 mion dòler. For di e kontròl a surgi algun korekshon ku nos a risibí dia 3 di aprel. Durante e periodo di aprel a deliberá e lista di korekshon huntu ku e akountent i na komienso di luna di mei, tabatin e promé konsepto di kuenta anual 2019. E kambionan primordial ku a hasi tabata riba ‘vastgoed’ impuesto di hospedahe. Despues di hasi e kambionan nesesario, e resultado positivo a bira 8.1 mion dòler. 15 di mei último a risibí e deklarashon di kontròl i relato di akountent i por a hiba e dokumentu imprenta. Kolegio ehekutivo a entrega e kuenta anual  2019 dia 26 di mei último na Konseho Insular, i ta for di 2 di yüni último a publiká riba ‘website’ di gobièrnu.

Por konkluí ku e trayekto’ di kuenta anual 2019 a kana segun e siklo di ‘Planning & Control’ i den kuadro di leinan vigilante ‘wetFinBes’. Diputado Tjin Asjoe a splika ku e saldo positivo ta konsekuensia ku nos a haña 2.9 mion dòler èkstra na entrada. Ta trata di ‘taxatieveaanslagen’ di ‘logeergastenbelasting’ di añanan 2014 te ku 2018 i korekshonnan di ‘opcenten/vastgoedbelasting’ 2018, ku tin karakter insidental. Na e parti di gastu durante di 2019 entidat públiko a saka un montante di 5.2 mion dòler, diputado Tjin Asjoe a bisa.

Share This
error: Content is protected !!