KRALENDIJK – Djaweps atardi tabatin un aktividat na Mangazina di Rei, kaminda a lansa un video relashoná ku abolishon di sklabitut. Promé ku a presentá e video, a dirigí palabra Angelo Alberto i diputado Nina den Heyer, kende ta diputado di kultura. El a menshoná entre otro e lema: No lubidá pasado, pero ban pa futuro.

“E aña aki sí ta bai para ketu na e fecha di konmemorashon, 2020 kita 157 aña ta 1863, fecha ku e hende a bira liber di sklabitut. ‘Coronavirus’ a kita nos balor di libertat i sosial di loke nos a kustumbrá. Hopi strès e asuntu di ‘lock down’ a trese kuné mundialmente. Mi ta hopi gradesido pa e grupo ku a hasi esaki posibel, pa krea loke nos ta bai mira awe. Nos tur ta bin di hendenan di esklabo. Tin diferensia esta esun ku nan a hasi katibu i esun ku ta katibu. Ta un tópiko ku tin ku papia di dje i sigui ku futuro, ”entre otro e diputado Nina Den Heyer a menshoná.

Despues a pasa e video pa medio di un pantaya, pa tur presente por a tuma nota di dje.
Dennis Martinus tambe a dirigí palabra kende a splika kon a yega na e idea pa traha e video. Esnan ku a traha e video tambe a papia di nan eksperensia, ku tabatin un durashon di tempu kòrtiku pa nan a pone tur kos huntu i awe e grabashon ta kla. Ta trata di Jose ‘Ito’ Martis, David Martinus i Jendric Janga.

Share This
error: Content is protected !!