Kralendijk – Últimamente tin sierto desaroyonan den aparato gubernamental den kua ta tuma desishonnan sin konsulta ku sindikato. Den tur silensio i sekresia ta tuma desishonnan ku kisas no ta na bienestar di e klase traha do i sigur no na benefisio di e empleado públiko. Ta trata aki tambe di kompanianan di gobièrnu. Nos mester trata na pone nos hendenan mes na promé lugá i no habri kaminda pa un invashon di ekspertonan djafó, pero krea ekspertonan na kas mes dor di eduká i halsa nivel di nos mes hendenan.

ABVO tin tur atenshon i ta vigilá ku wowonan di falki pa derecho di su miembronan no wòrdu trapa. GOBIERNU no por hasi i deshasí sin mas i pone pan di nos hendenan na peliger pa fasilitá i akomodá hendenan ku ta bula bin bin djòdjò. ABVO ta pidi su miembronan pa ta atento i pa nos no aseptá niun chanchuya i habri espasio pa krea mas pobresa riba nos isla. ABVO sigur lo no sinta man krusa i laga desishonnan kai ku no ta na fabor di e klase trahadó lokal. ABVO ta kompilando tur informashon pa informá su miembronan. Lo fiha un posishon i pa wak ki paso ta bai tuma pa evitá ku nos isla ta bai den man di otronan.

Share This
error: Content is protected !!