KRALENDIJK – E popular revista Bonè ta riba merkado atrobe ku su edishon nobo pa luna di yüni i yüli 2020.

Den edishon number 18 di e revista, ta para ketu na artistanan riba diferente tereno. Un di e artistanan aki ta e hóben Boneriano Irwin Sluis, ku su nòmber artístiko Ir-Sais. Otro artista Boneriano ku a para ketu na dje den e edishon aki ta Rudmarla Merenciana, ku su nòmber artístiko ta Goldiie.

Ir-Sais ta un hóben ku no mester di mashá introdukshon, komo ku e tin vários kansion konosí riba su nòmber. Asta ta’sina ku su kansion ‘Dream Girl’ ta un éksito total internashonalmente i tambe riba e aplikashon yamá ‘tik tok’.

Goldiie ta un fotógrafo i albes un hoyero. Interesante pa lesa kon el a kuminsá ku ámbos karera. E parti di saka pòtrèt nunka e la siña p’e. Pues e no a bai lès ni skol pa siña saka pòtrèt pero puramente di su mes. Portada di e revista ta un bunita bista di su trabou.

Banda di esakinan tin otro entrevista, horóskopo, Top20 di kansion nan ku mas a zona durante luna na Radio Live 99.9 FM i hopi mas ku lo kai sigur na agrado di tur lesadó. Bonè ta un revista ku ta keda publiká kada dos luna na ingles i ta grátis. E revista ta optenibel na diferente supermerkado i tienda aki na Boneiru.

Share This
error: Content is protected !!