KRALENDIJK – Fundashon Antriol Avanti i Proyekto Desaroyo di Bario a invitá diputado Nina den Heyer resientemente, pa duna splikashon di plan ku tin ku e edifisio di Sentro di Bario Antriol.

Diputado a splika ku e edifisio tin algun aña pará sin uso i sin mantenshon. Esaki pa diferente motibu. Awor a pone fondo disponibel pa drecha esaki i poné den uso komo un sentro kaminda hende nan ku haña nan den kualke problema lo por akudí i risibí e ayudo nesesario. Na e sentro aki lo tin diferente disiplina di servisio na bienestar di esnan den nesesidat urgente pa esaki.

E konsepto aki no ta konosí ainda na nos islanan tampoko na Hulanda. Esaki ta konosí na Bèlgika i Merka. Boneiru lo bira e promé isla ku lo introdusí esaki den Karibe. Antriol ta orguyoso di ta forma parti di esaki. Lo drecha e kancha di deporte i kambia esaki den un kancha multi funshonal kaminda hóbennan lo por praktiká diferente tipo di deporte.

Fundashon Antriol Avanti ta ehekutá aktualmente e funshon ku Sentro di bario tabatin den pasado. Ku e desishon pa bini ku un “Sentro di Seguridat pa famia”,Gobièrnu lo duna mas sosten i reforsá Fundashon Antriol Avanti pa amplia nan aktividat na bienestar di bario di Antriol. Resientemente a nombra un persona via di e proyekto di Desaroyo di bario komo beheerder na e fundashon.

Despues ku Diputado Nina den Heyer a kontestá tur pregunta di presentenan, a sera e anochi ku un gran aplouso di sosten na e proyekto ariba menshoná.

Share This
error: Content is protected !!