Kralendijk – E fenómeno aki no ta nada nobo. E ta sosodé na mas ku un okashon pa aña na momentu ku e stòf di Sahara ta wòrdu transportá atraves di aire pa nos region. E temporada aki e kantidat di stòf den nos atmosferá ta hopi mas ku normal i ta okashoná ku e kehonan por ta mas severo. Ku yegada di e stòf aki, nos por eksperensiá oumento den kehonan relashoná ku malesanan respiratorio. Esaki debi ku e aire ta konsistí di hopi mas stòf ku nos ta kustumbrá kuné. Esnan ku ta sufri di malesanan respiratorio manera brònkitis, alèrgí òf sainùs por nota oumento den nan sintomanan manera difilkultat pa hala rosea, preshon den pechu, hopi tosamentu i grawatashi. Stòf di Sahara ta okashoná tambe ku tempu ta bira mas kalor pa kual motibu ta rekomendá pa bebe mas likido durante dia pa tene e kurpa hidratá. Ta konsehá tur persona ku ta sufri di un òf otro malesa respiratorio pa pèrkurá pa tin nan medikamentunan na nan alkanse na tur momentu i tuma esakinan manera dòkter ta preskribí. Hasi superfisienan limpi mas frekuentemente komo ku stòf ta drenta kas, kamber, den outo i ofisina apesar ku esaki por ta será. Evitá di hasi aktividat físiko den aire liber den e dianan benidero i si tuma nota ku e sintomanan ta empeorá, tuma kontakto ku bo dòkter di kas.
Share This
error: Content is protected !!